Os custodios do patrimonio inmaterial

Case medio milleiro de artesáns certificados traballan na provincia de Lugo

Cerca de medio milleiro de persoas traballan na provincia de Lugo coa certificación da carta de artesán. Deles, un cento vive exclusivamente do seu oficio, na súa maioría, autónomos, que desenvolven a súa actividade creativa a tempo completo e que teñen o seu obradoiro inscrito no Rexistro Xeral de Artesanía de Galicia.

Contar coa carta de artesán permítelles dispor dunha certificación de coñecemento do oficio, e tamén é o paso previo para a obtención da cualificación de obradoiro artesán, dos que se contan máis de cen na provincia de Lugo, amparados baixo a marca Artesanía de Galicia.

Actividades variadas

Os sectores nos que desenvolven a súa actividade os artesáns lucenses rolda a trintena de especialidades: bixutería, bordado, calceta e gancho, cantería, carpintería, cerámica, complementos de moda, cestería, ebanistería, encadernación, escenografía, escultura, forxa, gravado, marroquinería, metalistería, modistería, olería, produción de instrumentos musicais, revestimentos decorativos, restauración, serigrafía, talla de madeira, tecido, tornería, traxes tradicionais, xoguetes, xoiería e zapatería.

Todos eles dan forma a un sector tan heteroxéneo nas súas especialidades como similar no xeito de concibir o seu oficio que, máis aló de ser o seu medio de vida, é unha filosofía de vida. Polas mans destes artesáns circula un saber ancestral, que é cultura e identidade, que transmiten a través das súas creacións.

Creacións por medio mundo

Son custodios dese auténtico patrimonio inmaterial que, sen eles, se perdería e que, con investigación, innovación e moito traballo, souberon adaptar aos tempos actuais. Só así se explica, non só a supervivencia de oficios tradicionais, senón que esperten interese e trunfen en medio mundo: que a cestería lucense desfile en Milán da man de Loewe, que en Xapón corten con coitelos feitos na Fonsagrada, que en Alemaña luzan bolsos deseñados e fabricados en Monterroso, que en América soe música de instrumentos nacidos nun taller de lutería de Outeiro de Rei ou que en Estocolmo demanden utensilios de cociña de madeira de oliveira creados en Quiroga.