«A venda ‘on-line’ vai destruír os cascos históricos»

Para Regal Cerámica non está sendo un ano fácil. A empresa acaba de prescindir de boa parte dos seus empregados —«algúns levaban trinta anos»—, asfixiada polas débedas, a caída en picado do turismo e das encargas, derivadas da pandemia, a popularización de plataformas de venda en liña —como Amazon— e a crise que xa arrastraba o sector pola competencia china.

Alfonso Otero Regal, Premio Nacional de Artesanía no 2011 e fundador desta empresa viveirense que leva desde 1982 levando a cerámica artesanal lucense por todo o mundo, ve con mágoa e indignación esta situación: «Eu non quero axudas, o que quero é que me dean traballo». E aí carga contra as administracións: «Hai mil formas de vender o noso, pero moitas veces valórase máis o de fóra».

Regal Cerámica conta cun museo, Regal Xunqueira, e un obradoiro de artesanía, do que saen pezas para máis de 200 tendas e para galerías de todo o mundo, ademais de artigos para agasallos de empresa ou institucionais. Son pezas decorativas e utilitarias, nas que emprega materia prima da zona para facer unha cerámica a alta temperatura: porcelanas, refractarios e greses, que son impermeables de por si e non precisan esmaltado. A decoración faise a pincel.

5.000 pezas deseñadas

Son todas pezas únicas, de series limitadas, «moita variedade e pouca cantidade», di Regal, que leva «5.000 pezas deseñadas na miña vida». Actualmente, está traballando nunha nova colección para funerarias, con xarróns e outras pezas, e ten case lista unha colección sobre o Camiño de Santiago. Pero no seu catálogo destacan desde vaixelas ata murais cerámicos, xarróns, reloxos ou esculturas.

Ademais da venda en establecementos especializados ou por encarga, dispón de tenda en liña, pero é moi crítico co hábito da compra «on-line» en plataformas foráneas: «A venda ‘on-line’ vai destruír as vilas e os cascos históricos: coa pandemia, moitos acostumáronse a Amazon e non entenden que se non consumen no seu pobo, o pobo acábase».

FOTO PEPA LOSADA Otero Regal, con algunhas das pezas almacenadas no seu obradoiro.