La Voz de Galicia (Lugo) - La Voz de Galicia (Lugo) - Especial3
«Facemos ‘stock’ para Nadal»
Tecelá, historiadora da arte, escritora e gran dinamizadora cultural no rural chairego. Son algunhas das tarefas de Miriam Fernández Otero, de San Bartolomé de Insua (Vilalba), que xestiona, xunto á súa nai, o obradoiro Fusaiola, onde deseña e confecciona de maneira artesanal pezas téxtiles de todo tipo. A pandemia obrigounas a parar o ritmo de feiras e eventos, pero están aproveitando para facer moito traballo de taller e poder poñer en marcha a venda en liña, aínda que actualmente recollen tamén encargas por redes sociais e fan envíos: «Estamos facendo moito stock para o Nadal: chales, bufandas, carteiras, bolsos de man, pendentes de liño, chaveiros...», explica. Os artigos están elaborados, fundamentalmente, con liño e la, pero tamén empregan algodón e algo de fibra sintética.
Pero as inquedanzas desta moza van máis alá, xa que tamén realiza investigacións sobre arte, etnografía, téxtil e cultura do mundo antigo. De aí que teña encargas de museos relacionadas con tecidos históricos. O ano pasado, ademais, publicou As Mulleres de Insua e o liño. Dez anos dun proxecto de recuperación etnográfica, editado polo Iescha.
Tamén é unha das impulsoras da Tasca do Liño, que este ano non se puido celebrar pola pandemia, aínda que si que seguiron adiante os certames de debuxo e poesía. En canto ao documental que se ía proxectar, O liño, arte e cultura, dirixido pola Asociación de Veciños de Cabreiros, «e para o que as mulleres de Insua aportaron todo o traballo da mostra dos procesos», colgouse nas redes sociais.