«Estes produtos non se estragan nunca, son eternos»

Madeira de oliveira e boa cociña compoñen unha maridaxe que coñecen ben na empresa Armaior. Desde terras quiroguesas, no lugar de A Toca, traballan os irmáns Pablo e Álvaro Rodríguez e a muller de Pablo, Ana Couto, para crear pezas artesanais a partir da madeira de oliveira.

O seu vén de familia; son a continuación dunha saga de carpinteiros: «Meu bisavó xa era carpinteiro, e tamén houbo tallistas na familia. Meu irmán e eu comezamos en 1999 como carpinteiros, facendo mobles, pero coa crise do 2008 tivemos que reinventarnos», conta Pablo Rodríguez. Así que optaron pola oliveira, que empregan, fundamentalmente, para elaborar utensilios de cociña, tanto para particulares como para cociñeiros profesionais, cos que manteñen un diálogo constante: «A madeira de oliveira é ideal para a cociña pola súa dureza, porque non absorbe, é 100% antibacteriana, e ten un veteado moi bonito, ideal para agasallar».

O proceso de elaboración das pezas require de moita paciencia, dun gran coñecemento da madeira e de longos tempos de espera: «Arredor dun 25% da madeira que utilizamos é de Quiroga, pero o resto procede, sobre todo, da cunca do Ebro, de troncos de podas», explica.

Ata cinco anos de secado

A madeira precisa de un a dous anos de secado para que se estabilice e non rompa ao traballala. Despois, en función de cada peza, necesitará outro tipo de secado a maiores: unha táboa de picar pode precisar dous ou tres anos de secado, mentres que unha cunca estará lista con seis meses de secado; en xeral, precisa un ano de secado por cada medio centímetro de grosor.

A isto hai que engadir que se trata dunha madeira con moitos nós, moitos debuxos, o que dificulta o traballo e obriga moitas veces a cambiar de planes cando se elaboran as pezas: «É unha madeira á que se ten que adaptar o artesán, non se adapta a madeira a nós. Isto implica moito tempo, por iso hai poucos artesáns que se dediquen a isto».

Dese laborioso traballo saen pezas decorativas, pero tamén, e sobre todo, utensilios de cociña: táboas de cortar, cuncas, ensaladeiras, froiteiros, espátulas, garfos, culleres, meleiras... Todos eles, sen data de caducidade: «Estes produtos non se estragan nunca, son eternos, non se dan acabado. O único mantemento que poden precisar é nutrir madeira con aceite».

A maior parte da clientela de Armaior é galega, pero tamén venden en tendas especializadas de París, Londres ou Estocolmo. De todos os xeitos, o 70% das súas vendas realízano en feiras de artesanía, cada vez máis profesionais, aínda que este ano a pandemia impediu a celebración de moitas delas. Tamén recollen encargas, de cociñeiros e de particulares, venden na tenda que teñen en Quiroga e dispoñen desde hai un ano de venda on-line, unha sección á que dedicarán grandes esforzos a partir de xaneiro, cando remate o cese de actividade.

Pablo Rodríguez elabora moitos produtos para a cociña.