La Voz de Galicia (Lugo) - La Voz de Galicia (Lugo) - Especial3
«Traballo con pedra e pel para interiorismo»
Ser finalista nos Premios Nacionais de Artesanía, que convoca o Ministerio de Industria, Comercio e Turismo, fixo que as encargas ao obradoiro de marroquinería de Santiago Besteiro, que xa habitualmente ten un volume de traballo importante, chegasen a moreas, sobre todo nestes tempos de agasallos para Nadal.
Do taller deste artesán de Monterroso saen pezas de alta calidade que el mesmo deseña e fabrica, fundamentalmente, bolsos, combinando o traballo da pel co da madeira, a pedra e a escultura.
Innovación, tradición, calidade e concienciación medioambiental van da man nas creacións de Besteiro, que xa deu tamén os seus primeiros pasos no ámbito do interiorismo e a decoración, con tallos, lámpadas, vasixas, esculturas... A súa nova colección, coa que vai continuar no 2021, chámase «Domus», e xa conta con pezas escultóricas en forma de vasos de gran tamaño (dun metro), cunha base de pedra e unha estrutura de pel: «Traballo con pedra e pel para interiorismo, seguindo coas técnicas que tamén uso nos bolsos, de mesturar diferentes materiais. Neste caso, ademais, está moi vinculado coa nosa cultura, coa tradición, coa pedra de granito, moi apreciada e utilizada en Galicia, e co coiro, tamén propio desta terra», explica Besteiro.
Etiquetas de trazabilidade
Outra liña de traballo na que pretende profundar aínda máis é a da sostibilidade, moi presente tamén na súa obra: «Primo os valores da sostibilidade, o compromiso coa cultura e coa preservación dun oficio artesán e a calidade á hora de fabricar as pezas, para que leven a un consumo menor. A idea é fomentar o consumo responsable, comprando obxectos de máis calidade, polo que se consumiría menos», sinala. Agora dará un paso máis incorporando etiquetas de trazabilidade.
Máis da metade da súa clientela procede de Europa central, sobre todo, de Alemaña e Inglaterra. As feiras profesionais eran a súa principal vía para vender, aínda que tamén recibe encargas en liña e ten produtos en tendas especializadas: «Con este novo escenario estou traballando tamén nunha nova web porque todo mudou e quero impulsar a venda on-line ».