Jauzi metodikoa
Primoz Roglic (Trbovlje, Eslovenia, 1989) izan da Itzuliko irabazlea Mikel Landa eta Ion Izagirreren aurretik, lasterketa aparta osatuta. Lortutako txapelak abizen gehiago ditu ordea, atzean jende ugari eduki duelako, taldekideak eta staff tekniko zabala. Tartean da Jon Iriberri biomekanikaria (Antzin, Nafarroa, 1974): “Taldearentzat garrantzitsua da aurtengo helburu nagusien artean zegoelako. Lortu dugu, baina denboraldia aurrera doa eta lanean jarraitu beharra dago”, dio ziurtasunez.
Itzulian Roglic “nahiko erregular” aritu dela dio Iriberrik, nahiz eta Arrateko azken etapako erorikoak zalantzaren bat sortu zien: “Ez dakigu errendimenduari dagokionez erorketak zenbaterainoko ondorioak izan zituen. Nekatuta ote zegoen presioaren ondorioz ala aurrekoak harrapatzeko egin zuen esfortzua pairatu behar izan ote zuen. Kontua da aurrez lortutako errentak kudeatuta lortu zuela garaipena”, azaldu du.
Alde hori, mahai gainean kolpea, Lodosako 19 kilometroko erlojupekoan eman zuen. Etapako garaipena eskuratu, lider jarri eta une hartan sailkapen nagusiko bigarrena, Julien Alaphilippe, 34 segundora urrundu zuen: “Gertatu behar zuena gertatu zen bera zelako parte-hartzaileen artean espezialista nagusia”. Horrek baino gehiago harritu zuen Zarautz eta Bermeoko lehen bi etapetan emandako mailak: “Ibilbide korapilatsua zen, tranpa askorekin, eta bazirudien Primozek primeran zekizkiela errepidearen nondik norakoak, baina batez ere hanka hobeak izan zituen eta momentua aprobetxatu zuen”, dio biomekanikari nafarrak.
Bertute bat aipatzeko eskatzerakoan “diziplinatua” dela azpimarratu du Jon Iriberrik: “Asko neurtzen ditu gauzak eta oso metodikoa da, errobot baten antzekoa. Bere emaitzak ez dira jeinutasun baten ondorio, atzean lan dezente dago. Iazko Roglicek Bilboko etapa eta Eibarko kronoa irabazi zituen Itzulian, aurten pisua galdu du eta erlojupekoan oraindik maisua dela erakusteaz gain, aldapa gora hobetu egin du”, azpimarratu du Iriberrik. Txirrindulari ezohikoa baita esloveniarra. Berandu, 22 urterekin, 2012an hasi zen pedalei eragiten eski-jauziak eta tranpolinak alboratuta. Ez pentsa txarra zenik, 2007an Munduko txapeldun izan zen junior mailan, baina ez zuen nahi bezalako bilakaera eduki: “Biomekanikaren ikuspuntutik abantaila da aurrez eski-jauzian aritu izana. Bere malgutasuna da nabarmentzekoa, batez ere flexiblea bazara, gorputza molda dezakezulako aerodinamika sortzeko”.
Palmaresean Itzulia, Tourrean eta Giroan etapa bana, Algarve, Eslovenia edota Bergeneko Mundialean lortutako erlojupekoko zilarra dituela, zaleen galdera da noiz emango ote duen itzuli handietara jauzia: “Ez dugu ahaztu behar sei egunetan eroriko baten ondorioz kili-kolo ibili dela. Astebeteko lasterketa bat irabazteko behar diren atentzioa, kontzentrazioa eta erregulartasuna ez dira Giroa, Tourra edo Vueltakoaren pareko. Errendimenduaren aldetik, Tourrean adibidez, lau bider adiago egon behar duzu eta tentsioa ikaragarria izaten da. Despisteen ondorioz erori edo jatea ahaztu eta kanpoan zaude. Bost egunetan focusa mantentzea erraza da, baina hiru astetan zehar mantentzea beste kontu bat da”, nabarmendu du Lotto-Jumboko teknikariak.
JON IRIBERRI “Diziplinatua da Primoz Roglic. Asko neurtzen du dena eta oso metodikoa da, errobot baten antzekoa”
Ekuazio guzti honetan norberaren izaera ere sartzen da, jakina. Mutil serioa da Iriberriren hitzetan, “euskaldunen gisakoa” eta lanerako sekula pegarik jartzen ez duen horietakoa: “Metodologia baten ondorioz lan egiteak mesede egin dio. Tom Dumoulinen antzerako erlojupeko probak egiteko gai da eta aldapa gora daraman eboluzioa mantentzen badu, teorian hobetu egingo du oraindik”. Baikor da Jon Iriberri, abisua eman du eta lanean jarraitzeko prest daude