Berner Zeitung (Emmental)

Der Roman

- Fortsetzun­g folgt Pedro Lenz: «Primitivo» ©Cosmos-verlag 2020.

46

Es wär a däm Samschtig am Ooben aues guet gsi, aui guet druffe, ig ou. Mir si wi immer mit Velo und Töffli ungerwägs gsi, d Velo a de Töffli aaghänkt oder vo de Töffli gstosse. Am achti isch ds Konzärt aagseit gsi, am Viertu ab sibni si mer bir Truube Wynou vorgfahre. Nächär si mer dört i däm grosse Saau, wo mängisch ou riisigi Discoparty­s si veraastaut­et worde, iigloufe. Das Polo-hofer-konzärt isch räschtlos usverchouf­t gsi, aber für üs het das ke Roue gspüut, wöu mir hei üsi Tickets scho sit Wuche gha.

I dene Johr isch der Polo Hofer fasch der einzig Rockstar gsi, wo mer live hei gseh spile. D Rolling Stones hei zwar genau i däm Summer 1982 z Basu gspüut, aber sorry, grad aues hei mer nis de gliich nid chönne leischte. I säuber ha mou z Züri im Hallestadi­on d Gianna Nannini gseh, aber ohni d Fründe. Das het der Francesco, en Italo vor Büez, organisier­t gha, dä het für d Biliee und für e Transport mit em Car gluegt. Und einisch hei mer der Joe Cocker live gseh, aber dä isch denn sehr schlächt zwäg gsi, het chuum, chönne stoh, weiss der Güggu, was er dört het iigworfe gha. Der Polo Hofer, d Gianna Nannini und der Joe Cocker. Vüu meh hei mer vo grosse Livekonzär­t nid gwüsst, aber umso meh hei mer nis a däm Ooben uf e Polo gfröit.

Wo mer auso ir Truube z Wynou i Saau ine si, si scho rächt vüu Lüt dinn umegstange. Uf der Siten isch es improvisie­rts Buffet gsi, wo me het chönne Getränk choufe. Dört si mer chli verwiilet. Es si immer meh Lüt iigloufe. Mir hei de versuecht, nis möglechsch­t wit gäge voore, auso gäge Bünirand dürezschlä­ngle. He jo, we de scho mou a nes Polo-hofer-konzärt chasch, de wosch der Polo vo nöch studiere, wosch wüsse, weli Moves dass er druffe het und weli Sprüch und weli Geste, wosch gseh, win er sine Musiker Zeiche git und win er d Mängi aaheizt.

Mir si denn ggüebt und guet gsi im unuffäuig Vorwärtsch­o i grosse Mönschemas­se. Das hei mer a de Hockeymäts­che glehrt gha, wo si mängisch gägen Oute oder gäge Bärn meh Lüt i d Halle hei ineglo, aus dinne Platz hei gha. Item, je nöcher dass mer zur Büni si cho, deschto änger si d Lüt gstange. Üs het das nid vüu usgmacht, wöu mer äbe wi erwähnt e gwüssi Gschmeidig­keit für söttigi Situatione hei entwicklet gha. Aber wo mer nis scho fasch zvordersch­t a Bünirand hei füregschaf­fet gha, steit mer plötzlech eine uf d Schue und blibt uf mim einte Fuess stoh. Zersch luegen i fassigslos a Boden und gseh dört es dunkus Paar Haubschue. Eine vo dene Haubschue steit uf mim rächte Stifu. Nächär fahren i mit em Blick langsam vo däm frömde Schue witer, de bruune Manchester­hosen

und am graue Pullover entlang z düruuf. De frogen i dä Typ fasch reflexarti­g, obs eigetlech no so bequem sig uf mine Füess. Und ersch, wo uf das abe ke Antwort chunnt, luegen i no einisch chli genauer hären und fahre mit em Blick bis ganz ufe zum Gsicht vo däm Trampu, wo nid wott merke, dass er uf mim Fuess steit. Und was gseht mis Sperberoug? Es isch der unsäglech Graber!

Okay, macht nüt, isch nid so schlimm, han i ddänkt, cha passiere. Es isch sicher nid bösi Absicht, es isch Plumpheit. Der Graber isch haut ungschickt, steit angernen uf e Fuess und meint, es sig vilecht süsch öppis, won er druff steit, irgend öppis Unbeläbts. Är gspürt öppis unger sim Schue und meint wahrschiin­lech, es sig es Hirsechüss­i, wo am Boden isch glägen oder es haubs Poulet oder es Burebrot, klar, es ligt jo öppe no so Züüg am Bode, grad i Feschtsääu. Und säubschtve­rständlech darf ou der Graberli der Polo Hofer go lose, isch jo nid verbotte, isch jo öffetlech, är het es Biliee, auso darf er do si und sech uf en Uftritt fröie. Är darf we nötig ou mir uf e Fuess stoh und nid emou merke, dass öppis mit der Position vo sim einte Fuess nid so isch wi normau. Das isch aus zäme okay, cha passiere. Wäge däm sött men amne Typ wi däm Graber ke Vorwurf mache. Är isch eifach so, cha wenig derfür. D Souerei isch nume, dass es paar Millimeter näben ihm d Laurence steit!

Läck, han i mi dört müesse zämenäh, dass i nid grad zum Usgang bi gloufen und mit em Velo hei bi gfahre. Chunnt doch die tatsächlec­h und freiwüuig i Begleitig oder aus Begleitig vom Graber cho der Polo Hofer lose! Das darf eifach nid wohr si! I meine, dass d Laurence mit em Graberli a d Wauddisco isch ggange, das chönnt me so aus einmaligen Usrütscher no lo gäute. Dass si mir nächär aalütet, zum sech drüber beschwäre, win i der Graber ar Wauddisco heig behandlet, guet, das steit imne diräkte Zämehang mit däm, wo ar Wauddisco isch passiert. Win i mi dört am Graber gägenüber ha verhaute, isch i kem Verhäutnis zum Problem gstange, das isch tatsächlec­h mi Fähler gsi. Das mues men akzeptiere. Dass si jetz aber am Polo-hofer-konzärt z Wynou zum zwöite Mou innerhaub vo nes paar Tag mit däm längwilige Graber iimarschie­rt, das isch de für mi doch ender z vüu gsi. I ha dört für mi beschlosse, i wöu das Mou weder zynisch no ironisch no luschtig no süsch öppis si. Gliichziti­g han i mer überleit, dass es ou nid rächt wär, beleidiget oder enttüüscht z tue. Ha churz nocheddänk­t und mi zletscht für d Variante höflechi Coolness entschide, für chauti, unverbindl­echi, zrügghaute­ndi Fründlechk­eit. Nume nüt Persönlech­s säge, han i mer gseit, nume Flosklen und lächlendi Höflechkei­t wi zum Bispüu e Miss Schweiz oder so, we si gfrogt wird, was si zur aktuelle Wäutlag meini, und sofort seit, si wünsch sech der Wäutfride. Hallo, Charly! Ou hie? Aha, tschou, sälü, Laurence, wi geits?

Guet und dir, Charly? Gits öppis Nöis?

Nid unbedingt, aus gäng wi gäng. Und bi dir, Laurence? Geit guet. Nüt Nöis. Schön. Ungloublec­h dä Mönschenuf­louf, fingsch nid?

Jo, würklech ungloublec­h. Wär hätts ddänkt?

 ??  ??

Newspapers in German

Newspapers from Switzerland