Na setimana dopo… perché sa sa mai!

l’eva la Pasqueta, al dì dopo da la culumba e dai cünili… quii da ciculat.

Se ma sbagli mia, i eva scià i cinq e mezza, forse i ses. Tant par cambià, seva drè na là dala Cinta a bef un bianc e cascià quatar ball, tant par met a post al mund.

Foo quatru pass e vedi ’l Togn setaa giò. Mia in mezz a la strecia, li da part, in dala cüneta. Davanti da mi vün che cugnosi poc o mia … al ga pasa davanti, al guarda ma ’l fa mia na piega e nanca ’n cip. al Togn: “Pasa la süperbia”!

Ma fermi. “Sè te cumbinaa Togn?”… “Ò rataa la tempistica; seva scià un poo cott, l’è vera. Ò pensaa ‘andiamo a casa antonio che si sta facendo buio’. Pö ma sum dii: bevevam mo vün va, tant cambia pü nagott. epoo, lè lì cò rataa la tempistica e o duvuu di ‘andiamo a casa antonio che si è fatto buio’. Ma sum inviaa e sum finii chi… sa ved che gheva mò doss anca quela da ier…”.

“nem a ca Togn che ta vüti mi”. lo tiraa sü cumè o pudü, na quai manera. Sem inviaa e dasi dasi sem rivaa. Sevum lì, sota ca. “Stac atent” al ma dis. “l’è mia na scemada”. e ’l taca: “e dall’alto del mio balcon vedo il sole a

tramontar”… al sa volta versa da mi e ’l ma dis, adasi però: “ghö scià ’l bel” …“vieni mio amor, vien con me nel giardino dei fior …”

Sa vert na finestra… “tal do mi al “vieni mio amor”, piantalalì Togn. Te ciapaa dent anca ’n cö… ta ghee mia vergogna! Dai, vegn sü che ta la foo pasà mi…”

Sa sera la finestra. al Togn al ma guarda doss: “te capii? e mo se fem? Vegn sü anca ti che ta ma vütat”.

“e no Togn, dess toca ti… da par ti”.

al tira ’l fila, al ma dögia – un para da volt – “ta vedat, par mi l’è mo ’l Venerdì Sant”.

Parché?

“Parché dess cumincia la Via Crucis”