Vutaziun federai

Vöraria mia esagerà, né tanto menu sbaglià, ma sta storia di liberai e uregiat che i vö metass insema, füdess dumà par i vutaziun federai (mah?), la ma fai vignì ’n ment, anca mò, la storia da quii dü vegett, che tu già cünta sü.

Ta sa regordat dal Lisandru el Michee: “Se ta votat Lisandru? Speta che guardi… al verdeva ’l Dovere e… mi voti sì.

E ti Michee? Speta che guardi… al verdeva al Popolo e Libertà e… mi voti no.

Cert che ma regordi. E ma regordi anca che gheva do sal da bal: al Teatro Sociale pai liberai e l’Opera Pia pai uregiatt. Guai sgarà. I vegneva töt prima che d’una part i tacass “Luigi Rossi a noi davanti sta…” e da l’altra “O Lugano tu sei la più bella, Bellinzona tu sei la più forte…” Sa scherzava mia. Sa tacava anca lit, san diseva drè da tuc i culor… se füdess mi al so post… e la colpa l’eva sempru da quel altru…

Ta vedat, na volta anca la gent comé nun i pensava da fa pulitica… o ga sumeava da fala. Magari sbagli, ma mi ma par che incö la pulitica, par furtuna, ga menu “folclore”, l’è menu culurada, almenu. Insci ma sumea: “Se al la di lü… se al la fai lü!”. Ghè dumà da sperà che quel Lü la al sia padrun anca di nos sbagli e anca d’una quai colpa.

Però bisögna fidass anca se, quii là in sü la pultrona, i sa met mai i man in di cavii, ma man in man… na volta mi, na volta ti.

Ma se disat sü! Ta se fö da strada. Al mund l’è cambiaa e par furtüna. Lasem perd sta menada d’una volta. Na volta, na volta! Na volta l’eva pec da dess!

Amico mio, po dass che ta gabiat resum. Mi sum mia insci cunvint. Lasa perd. Turnem ai vutaziun federai, che l’é po’ quel che cünta. Sumea che “l’eterno conflitto” al sia finii. A menu che i ma la fa cred… in tra da lor invece…

Sperem che gabbia mia resun quel là che ’l diseva: “Stop alle grandi opere, via alle operette!”.