Citus mutus

Amico mio, ta fa nagot a tasè, almenu par cinq minut. L’è püse d’un mes che ta see drè. La Nuvena, l’Ante e la Vigilia, Natal, San Stefan, la fin da l’an, al prim da genar, i Re Magi!

Va ben che duvarium vess abituaa. Vivum in d’un mund pien da tütt quel che manca mia. Ma dess sem stai, almenu par mi, bumbardaa da reclam che i ga ciama pubblicità, da parol che i ta dis quiecos e parol che ta dis nagot, da vos che parla e vos che vosa, nutizi fai par nün e nutizi fai par lor.

Ta trövat mia che l’è ora da fa na pausa, da fermas un atim, da tirà ‘l fiaa, da pensà da par ti (quel che i ga ciama “riflessione”).

Ta ma disaree che i Fest i è pasaa e quel che u dii prima, al bumbardament, l’è finii e dunca...

L’è vera, ma l’è anca vera che da chi un quai dì ghè scià ‘l Carnevaa e, cum’è ta disat ti... dunca...

Ta foo ‘n esempiu: l’è già un quai an che su in Finlandia a ghè di

siit da vacanza in duva ghè dumà quiete e silenzio e, par che ‘l sia ‘n sücess, e mia da pooc… dunca...

L’è mia ‘l cas da na in Finlandia, basta tasè e cercà da capì che ‘l silenzio al ta fa ben. Cum’è feet a pensà e capì se ghè ‘n gir un casott che finis pù. Inveci, se ta see lì da par ti, al masim ta tacat lit cul to cò, senza pudè vert la boca e se ta la verdat ta cunvegn serala.

Da ganasun ga n’è ‘n gir tanti, ma da quii che scolta pooc, trop pooc. Tai vedat che i scorla ‘l co, par tignì denta quel che, tanti volt, var mia la pena da bütà föra: tant l’è stess, cambia nagott.

Amico mio, regordas che al silenzio l’è cumè la müsica... al sa scolta!