Al 14 da febrar...

Amico mio, i dev mò spetà ’n an par dis che i sa vör ben!

Ma ta see mai dumandaa cusé che l’è stu “amore” e anca al parché al cercum.

Al dipend da quaicoss, da quaidün, o ’l riva inscì, senza dumandag nagot a nisün?

Se ’l riva da par lù devum domandass cum’è mai. Quand, in dua, cum’è, parché?

E se inveci al dipendess da quaidün o da queicos?

Scolta... te mai legiü “Il diario di Adamo ed Eva” dal Mark Twain? Cumè mai quii dü lì i s’è inamuraa?

Mah? I eva dü fiörasc che i giügava, i sa divertiva... Doputütt i eva in Paradis... Se vöt püsee. Pö süced quel che è sücedü... Sta maledeta poma o se i ga ciamaa poma par mia dì...

Cusè ’l pensa l’Adamo. Adess che sem pü i padrun (in pratica i ma bütà föra) goo bisögn da lee. La farò lavurà, tant l’è mia, ma dasi dasi al capiss che senza da lee al po mia sta...

Eva, cumè fa tanti donn, la fa mia tanti stori. Parché ga vöri ben? Parché l’è intelligent?

Parché al lavora? Parché ’l sa tanti rob?

No, ga vöri ben par na roba sola, parché l’è me, dumà me.

È lora.

E lora ghè poc da pensà, da resunà, da dag a trà al fatu da ves donn (Eva: sum mi la prima) ma parché lü l’è me e basta... Par sempru.

Tant par finila lì...

Pò das che ma sbaglia, ma a mi ma sumea che quel che cünta a lè ti sa se mia o mi sum tua, o se ta preferisat ti ta se me o mi sum to.

D’acordi, ma la qualità dal me o dal to in duva la metum?

Ta foo na dumanda: l’è mia che ti ta pias a inventà ’n prublema par fa vedè che te trovat la soluziun?