Beachd Ailein
CHA TÈID DUINE le tuigse às àicheadh nach e foghlam tron chànan bunait leasachaidh na Gàidhlig, agus tha fios againn nach eil dòchas air tèarainteachd aig a’ chànan às aonais seirbheis foghlaim choileanta tro mheadhan na Gàidhlig.
Gun teagamh, tha iomadh seirbheis a dh’fheumas luchd- cleachdaidh na Gàidhlig gus cothrom a bhith aca am beatha làitheil a’ leigeil air adhart tron chànan seo, ach às aonais an fhoghlaim tha a h-uile coltas gum bheil Gàidhlig dol a sheargadh às. Leis nach eil Gàidhlig anns a’ bhitheantas ga h-ionnsachadh dha clann mar chànan-màthaireil tha foghlam tro mheadhan na Gàidhlig deatamach gus àireamhan luchd-labhairt fhàs. Sin prìomh amas Plana Nàiseanta na Gàidhlig agus tha còir aig a h-uile Plana Gàidhlig a bhith mothachail air seo agus a’ cuideachadh a dh’ionnsaigh a’ chinn-uidhe sin.
Cuiridh mòran taic ri pàrantan Bhun-sgoil Shlèite san Eilean Sgitheanach nan iomairt gus toirt air ùghdarrasan foghlaim a bhith nas sùbailte le riaghailtean a thaobh àireamhan chloinne ann an clasaichean foghlam tro mheadhan na Gàidhlig.
Ged nach eil eadar- dhealachadh mòr eadar cosgaisean foghlam tro mheadhan na Gàidhlig agus foghlam tron Bheurla, feumar aithneachadh gum bheil siostam na Gàidhlig fhathast a’ fàs agus nach eil àireamhan cho làidir. ’S e sin a dh’fhàg gun robh an Riaghaltas a’ toirt taic thabhartasan sònraichte gus cuideachadh leis a’ chosgais a bharrachd a bha an lùib chlasaichean beaga fhad ’s a bha aonad Gàidhlig a’ fàs.
Bha, agus saoilidh mi gum bheil fhathast, taic airgid leasachaidh foghlam Gàidhlig ga chuimseachadh air an ìre às fheàrr de theagasg a thoirt seachad, agus ged a thuigeas mi carson a bhiodh Comhairle na Gàidhealtachd airson na h-aon riaghailtean a thaobh meud chlasaichean a chur an sàs feadh an cuid sgoiltean, saoilidh mi nach eil toradh an fheallsanachd seo idir gu bhith a rèir nan amasan nàiseanta airson na Gàidhlig ris am bheil a’ Chomhairle a’ cur taic.