Beachd Ailein

THA CIANALAS agus dòchas nàdarra aig àm Bliadhn’ Ùire, ràith a bha riamh cudromach dha na Gàidheil ged a bha ceann-latha na Seann Bhliadhn’ Ùire na bu bhitheanta ga comharrachadh aig mòran.

Tha beagan den sin ri fhaicinn fhathast ged is ann mar is trice mar leisgeul airson cuirm a chur air adhart gus airgead a thional airson carthannas air choreigin. Fhad ’s a tha daoine deònach tionndadh a-mach gu leithid sin agus ma chòrdas e riutha, tha fhios gur e rud math a th’ ann.

Chuala mi ministear ag ràdh aig seirbheis tiodhlacaidh bho chionn ghoirid gum bheil gàire na phàirt de leigheas bròin cho math ri rànaich, agus tha e math do dhaoine a bhith an cuideachd a chèile le beagan àbhachdais.

Mar a bhiodh dùil ‘s dòcha tha saoghal coimearsalta air greimeachadh air àm Bliadhn’ Ùire mar a tha air a h-uile dad eile agus tha bailtean mòra na dùthcha a’ farpais ach cò as motha a nì de dh’othail ciùil is eile oidhche Challainn. Gun teagamh freagraidh sin air an fheadhainn as òige sa mhòr- chuid, ach bidh gu h-àraid an fheadhainn as sinne ag iarraidh ‘dhachaigh’ mar a tha Donaidh Large Dòmhnallach na òran A’ Tilleadh Gu Mo Thìr.

Am faca tusa riamh bodach le cheann liath A’ toirt facal às an Leabhar an ceann a’ bhùird? Mo bheannachd aig an t-sluaigh ‘s tric orra mo smuain, Bidh mi tilleadh gu mo thìr aig àm Bliadhn’ Ùir’.

Am faca tusa riamh bodach le pìob chrèadh, No cailleach a’ dèanamh mharag- choirc is flùr? Bidh mi fhìn ’s mo dhuain a’ togail oirnn gu tuath, Bidh mi tilleadh gu mo thìr aig àm Bliadhn’ Ùir’.

Gu mì-fhortanach dha mòran againn tha daoine a b’ aithne dhuinn aig na ‘dachannan’ sin a’ sìoladh às agus tha coigrich a’ gabhail an àite, agus tha na taighean- cèilidh Gàidhealach a sìor fhàs tearc.

Sin fear de na h-adhbhair gum bheil e cho deatamach