Beachd Ailein
BHA CAOCHLADH ADHBHAIR cianalais agam ‘s mi aig an t-seann dachaigh ann an Caileabost Disathairne seo chaidh. Mar a thuigear ‘s cinnteach, chan eil uair a thèid mi ann nach eil mi a’ cuimhneachadh air feadhainn nach eil cuide rinn tuilleadh.
Tha mi a’ dèanamh beagan leasachaidh air an taigh agus mar phàirt den obair sin tha cuid den stuaigh a th’ air a’ chidsin air chùl an taighe ri leagail, agus chan eil sin furasta! ‘S ann an 1960 a chaidh na ballaichean seo a thogail fo stiùir Dhòmhnall ‘an ‘ic Nèill is sgioba beag, agus le cuideachadh bhom athair.
Chan eil duine dhiubh sin beò an- diugh, ach a’ coimhead mòr-spàirn mo bhràthair- cèile a’ snaidheadh nam ballaichean le sàbh- cloiche, shaoil mi gum bheil na rinn iad na chuimhneachan maireann air ealantas agus snas an cuid obrach. Bha mi cuideachd a’ smaoineachadh air dùbhlain na h- obrach a bha romhpa an uairsin seach mar a tha cùisean an- diugh. Dh’fheumte frèam taice a thogail a ghleidheadh concrait nam ballaichean chun an cruadhaicheadh e, agus bha aca ris a h-uile unnsa den stuth sin, agus clachan a bha dol na mheasg, a thogail ann am bucaidean gus a dhòrtadh dha na frèaman.
Fìor obair chruaidh agus throm! Chan iarrainn cur sìos air saothair luchd- ceàird sam bith ach chan ionann ’s mar a tha gnothaichean an- diugh le clachan concrait agus innealan de gach seòrsa gus an obair a leigeil air adhart.
Cha b’ ann airson a’ chiad turas a thàinig fiamh gàire orm is mi a’ smaoineachadh dè shaoileadh “na laoich nach eil beò” air ìre nan sochairean ris am bheil sinne cho cleachdte a-nise. Le cinnt ghabhadh iad annas asta agus chuirinn geall ged a chleachdadh iad cuid dhe na “dòighean ùra” gu toileach, leanadh cuid de na seann chleachdaidhean cuideachd oir ‘s iad “a bh’ aca riamh” agus ‘s iad mar sin a b’ fheàrr!
Saoilidh mi gum bheil sinn uile beagan leisg cùisean atharrachadh aig amannan, agus gu dearbh tha deich bliadhna bho thòisich mi fhìn a’ beachdachadh air an obair-leasachaidh seo air an t-seann taigh! Am measg mo smuaintean chianail Disathairne bhuail fìrinn an t-seanfhacail orm glè làidir, gur e beul a labhras ach ‘s e gnìomh a dhearbhas! Ann a bhith a’ cur meal-a-naidheachd air Coinneach Mac an Tòisich mar Oifigear Riaghlaidh ùr Phàrlamaid na h-Alba, agus ged a chuirinn fàilte air nas lugha de chonnspaid eadar-phàrtaidh, bhithinn an dòchas gun cur e air adhart leasachaidhean a bhios gu math na Pàrlamaid agus an sluagh a tha i a’ frithealadh.
HAVING eventually started renovations at the old family home in Skye, I have thought nostalgically of the tradesmen whose work is a lasting memorial to their expertise.
In congratulating Ken Macintosh MSP on his appointment as Presiding Officer of the Scottish Parliament, and while welcoming his aim of less inter-party sniping, I also hope Ken will seek improvements to benefit Holyrood and the people it serves.
Ailean Caimbeul (Allan Campbell) ailean@obantimes.co.uk