Beachd Ailein
SIN MÒD IONADAIL INBHIR NIS seachad airson bliadhna eile, agus tha mi air leth toilichte aithris gun robh e soirbheachail.
Bha àireamh nam farpaiseach ann am Mòd na cloinne misneachail àrd a-rithist agus theagamh fiù ‘s nas cudromaiche buileach bha britheamhan sa mhòr- chuid a’ moladh ìre a’ chànain a bha iad a’ cluinntinn.
Mar a bha mi ag ràdh air an t-seachdain seo chaidh, tha dùbhlan aig mòran den luchd-ionnsachaidh leis nach eil cothrom bogaidh aca ann an coimhearsnachdan Gàidhlig, agus gu dearbh tha e draghail cluinntinn gum bheil cleachdadh na Gàidhlig a’ lagachadh mar chànan làitheil coimhearsnachd fiù ‘s ann an sgìrean sam bheil i meadhanach làidir fhathast.
Cha robh na faclan “cleachd i neo caill i ” riamh cho fìor saoilidh mi!
Ach abair gum bheil oidhirp ga dhèanamh le cloinn ann an sgoiltean feadh na dùthcha, agus ged a tha toradh an t-sìl cànain sin ri fhaicinn ‘s ri chluinntinn aig leithid na Mòdan ionadail, tha feum air taic leasachaidh a neartachadh agus tha feum gu sònraichte aig an fheadhainn a tha ag ionnsachadh air taic luchd-labhairt na Gàidhlig.
Mar a bhios fios aig mòran agaibh tha farpaisean còmhraidh air a bhith mar phàirt de Mhòdan fad iomadh bliadhna ach ri linn ‘s mar a tha coimhearsnachdan Gàidhlig air crìonadh agus uimhir den luchd-ionnsachaidh cho fada air falbh bhuapa, tha na cothroman còmhraidh seo a sìor fhàs nas cudromaiche aig, agus taobh a-mach Mhòdan.
Saoilidh mi gum feumar sealltainn air ciamar a ghabhas dèiligeadh nas sgiobalta ri àireamhan a tha a’ fàs air leth mòr gus dèanamh cinnteach gum bi na tachartasan sin tlachdmhor agus tarraingeach dhan chloinn.
Chan eil sinn dol a ghleidheadh an amais sin ma tha clann nan suidhe còrr air dà uair a thìde a’ feitheamh ri còmhradh fad trì neo ceithir a mhionaidean fhaotainn le britheamh.
Le aithne bhuidhnean-leasachaidh air luach nan còmhraidhean sin agus am brosnachadh a tha luchd-ionnsachaidh a’ faotainn mun coinneimh, saoilidh mi gun gabhadh adhartas buannachdail a dhèanamh.
Mun àm a bhios sibh a’ leughadh seo bidh an reifreann mòr air an Roinn Eòrpa an impis a bhith seachad agus ge b’ e dè an taobh a thèid sin, nì mòran gàirdeachas is dùil aca ri crìoch na deasbaid ghuiniche a tha sinn air a bhith a’ fulang fad mhìosan.
Tha an iomairt airson na Gàidhlig a’ dearbhadh dhuinn cho prìseil ‘s a tha cànan, ach mar a chunnacas uair is uair san iomairt a thaobh ballrachd Bhreatainn san Aonadh Eòrpach, tha ana- caitheamh cànain sònraichte cunnartach.
Chan eil mise dol a sparradh beachd pearsanta air a’ cheist seo oirbh, ach taobh seach taobh tha mi an dòchas nuair a thig latha taghaidh gun tig comhairle ghlic dhuibh uile.
TODAY, Britain decides on its EU membership and many will look forward to the ending of a campaign which has steadily descended into personal insult and vitriol rather than informative debate.
I hope all who vote today will be inspired by instinctive wisdom.