Beachd Ailein
THA DAOINE COMA DHIOT, chan eil thu gu luach sam bith dhan chomann-shòisealta.
Nach brùideil agus mì-chneasta leithid sin de theachdaireachd ga sparradh air pàistean òga, agus cha bheag an t-iongnadh ged a bheireadh sin agus ionnsaighean borba agus drabasta eile, buaidh mhaireann orra. Tha e doirbh dha daoine àbhaisteach tuigsinn ciamar is urrainn dha cuid a bhith cho an-iochdmhor, agus gu h-àraid ri clann. Ciamar a tha na daoine sin beò len cogaisean fhèin?
Agus ged a tha dearbhadh ann gun robh leithid de neo-thruacantachd a’ gabhail àite fad is farsaing ann an ionadan cùram chloinne thairis air iomadh bliadhna, bha mòran dheth cuideachd a’ tachairt fo smachd shagartan agus mhnathan- cràbhaidh ann an ionadan aig an robh ìomhaigh onarach creideimh mar leithid Taigh Nàsaret. Tha fichead bliadhna bho nochd fios mun eucoir a dh’fhuiling clann a bha “fo chùram” an ionaid seo agus ‘s e masladh gun seadh a th’ ann gum bheil iad sin, nan inbhich an- diugh, fhathast a’ feitheamh ri èisteachd phoblach agus tomhais air choreigin de cheartas.
B’ e adhartas a bh’ ann nuair a dh’ainmich Riaghaltas na h-Alba, ann an 2014, gun robh Rannsachadh Drabastachd Chloinne na h-Alba ga stèidheachadh, ach chan annas e gum bheil mòran den fheadhainn a tha a’ giùlan lotan piantach na thachair dhaibh a’ sìor chall misneachd is a-nise dithis den triùir a bha os cionn an rannsachaidh air an dreuchdan fhàgail.
Ged a tha Ministearan Riaghaltas na h-Alba a’ dol às àicheadh chasaidean gum bheil iad a’ gabhail cus gnothaich ri obair an Rannsachaidh, tha e air nochdadh a rèir aithris gun robh eas-aonta eadar cathraiche an rannsachaidh agus an riaghaltas a thaobh cosgais togail fianais dhan rannsachadh. Tha e coltach gun robh Iain Swinney den bheachd gun cosgadh e mu cheud not san uair àrd-luchd-lagha fhastadh gus fianais a thogail is gum biodh seirbheisich chatharra na bu shaoire.
Bidh e coltach gun robh an dithis a leig dhiubh an dreuchdan air an rannsachadh den bheachd nan leanadh leithid seo de bhuntainn bho Mhinistearan gum faodadh neo-eisimeileachd cho- dhùnaidhean an Rann- sachaidh a bhith air an lagachadh. Ged a tha gun teagamh dleastanas air Ministearan smachd mhionaideach a chumail air ionmhas poblach agus an luach as fheàrr fhaotainn às, saoilidh mi gum bheil amannan ann far am bheil amas agus buil obair àraid dol a chiallachadh nach i a’ phrìs as lugha as fheàrr a lìbhrigeas toradh.
Theagamh gur e seo leithid sin de shuidheachadh agus gum bheil e iomchaidh cosgais beagan a bharrachd a thasgadh san obair mar dhearbhadh air beachd na dùthcha gum bheil luach ga chur air na h-uile sin a dh’fhuiling cho mòr. THE SCOTTISH Government must ensure the independence of the Scottish Child Abuse Inquiry, and new members should be appointed quickly to retain momentum.
Too many people continue to suffer from cruel abuse experienced in childhood, and a civilised country owes them a hearing and justice. It is time to demonstrate that they are valued and respected.