Beachd Ailein

MUN ÀM A BHIOS cuid agaibh a’ leughadh seo bidh fothal nach beag a’ gabhail àite sa Bhlàr Dhubh aig an 179mh Fèill Àiteachais an Eilean Duibh.

Thuirt rùnaire na Fèille gun robh dùil ri tachartas soirbheachail eile am-bliadhna le 360 beathach cruidh agus còrr air mìle caora gam foillseachadh, a bharrachd air a liuthad taisbeanadh agus stàilichean bhuidhnean gnìomhachas àiteachais.

Am-bliadhna cuideachd tha taisbeanadh nàiseanta Alba de chrodh Simmental a’ gabhail àite le faisg air ceithir uimhir den bhriod seach an àbhaist rim faicinn.

Ach a dh’aindeoin misneachd a’ bhrath-naidheachd, bha faireachadh beagan an-fhoiseil na lùib cuideachd.

Cha robh taisbeanadh each an lùib na Fèille am-bliadhna, agus chan eil daoine air cothrom a ghabhail gus tiogaidean a cheannach ro-làimh air an eadar-lìon. An e fìrinn na cùise gum bheil latha fhèilltean àiteachais mhòra agus bheaga a’ tighinn gu crìch?

Disathairne seo chaidh bha mi aig Fèill Àiteachais Sgìre Dhiùranais ann an Dùn Bheagain, agus mo bheannachd aig a’ chomataidh a rinn spàirn ga dheasachadh.

Chan eil cuimhne agam cuin a fhuair ‘Show Dhùn Bheagain’ latha grianach mu dheireadh, agus thòisich cùisean fliuch am-bliadhna a-rithist! Ach thog an latha air agus bha deagh fheasgar aca agus cha robh gainne air sluagh.

Chan fhaca mi riamh leithid a choltas charbadan sa bhaile, cha robh òirleach àite-parcaidh ri fhaotainn eadar a dhà cheann.

Saoilidh mi mar sin gur e tachartas soirbheachail a bh’ aca ach aig an aon àm, agus mar a chithear feadh na Gàidhealtachd, bha taisbeanadh àiteachais air crìonadh seach mar a b’ àbhaist agus bha rudan eile a’ lìonadh prògram an latha. Chan e cronachadh a tha sin air chor sam bith ach lèirsinn air mar a tha cùisean ag atharrachadh ann an saoghal croitearachd.

Bha mòran tàmailteach mu cho beag de lusan is glasraich ‘s a nochd ann am farpais na Fèille agus nuair a dh’fhaighnich mi an e droch aimsir a bu choireach, chaidh innse dhomh nach b’ e ach gun robh aon neach air a bhith a’ buannachadh fad bhli- adhnaichean agus gun robh càch air misneachd a chall. Nuair a sguir an neach sin am-bliadhna, dh’fhàg sin beàrn mhòr san taisbeanadh!

Chan eil teagamh nach e co- obrachadh eadar bhuill nan coimhearsnachdan fear de na prìomh bhuannachdan an lùib croitearachd, agus far am bheil sin a’ lagachadh ri linn dhaoine bhith a’ fàs sean agus a’ sgur a dh’obrachadh na talmhainn neo air sgàth adhbharan eile, saoilidh mise gum bheil bunaitean chroitearachd an cunnart.

‘S e mo bheachd gum bheil feum aig croitearachd air taic is misneachadh agus nach eil an Coimisean poblach is còir sin a thoirt dhaibh ga dhèanamh!

AGRICULTURAL shows mirror the health of crofting and farming, and it is sadly not surprising to find that acres of bracken and rush-infested croft land, and un-grazed moor are reflected in diminished exhibits.

When the foundations of a way of life are in jeopardy, crofting needs motivation rather than heavy-handed bureaucracy.