Beachd Ailein
‘S FHADA BHO CHUALA mi beachd gun robh seòbhanachd fhear nas bitheanta ann an Alba na an àite sam bith eile. Gu cinnteach bha boireannaich na dùthcha seo, anns an fharsaingeachd, a’ frithealadh nam fear gu ìre millidh agus leisge.
Tha amharas agam fhìn gun robh ceangal aig a’ chleachdadh seo ri mar a bha teagasg nan eaglaisean a’ cur dleastanas ùmhlachd air mnathan dhan cuid fhear. Tha mi toilichte gum bheil cùisean ag atharrachadh ged a tha cuid a bhoireannaich a tha ‘s dòcha a’ toirt cus smachd dha fir fhathast.
Ceud bliadhna air adhart bho fhuair a’ chiad bhoireannaich cothrom bhòtaidh, nach iad na mnathan gaisgeil sin a sheas còraichean co-ionannachd an aghaidh siostam a bha cho mì-chothromach a tha airidh air cuimhne agus spèis. Mar iomadh cuspair a’ dèiligeadh ris an dùthaich seo fhèin ’s e glè bheag a chuala an ginealach agamsa mu na suffragettes ann am foghlam sgoile, agus tha e smaointinneach da-rìribh a bhith a’ faicinn ’s a’ cluinntinn mar a tha mì-chothromachd fhathast ann am beatha làitheil mhnathan, gu sònraichte a thaobh ìre thuarastalan agus chothroman cosnaidh. Le aithne gum bheil seanfhaclan a’ sealltainn lèirsinn linntean a chaidh romhainn, bidh mi tric a’ toirt sùil air na tha a’ nochdadh fo chuspairean àraid, agus tha dearbhadh gu leòr air an tuigse a bh’ ann air buaidh dàlach. An rud san tèid dàil thèid dearmad.
’S e meathadh gach cùise dàil! Is fad an dàil on oidhirp.
Tha sinn eòlach gu leòr air mar a tha innleachd dàlach ga chleachdadh ann an caochladh shuidheachaidhean san latha an-diugh agus tha deagh thuigse aig mòran air mar a bhios daoine agus coimhearsnachdan a’ call an cuid spionnaidh agus spàirn mar a thèid ùine seachad gun adhartas. Bidh mi fhìn tric a’ gabhail fìor iongnadh mun ùine gun chiall a bhios cùisean-lagha a toirt a’ tighinn air adhart, agus gu tric na daoine a tha a’ sireadh dìoghaltas a’ bàsachadh fhad ’s a tha iad a’ feitheamh. Am bheil da-rìribh feum air uimhir de dh’ùine deasachaidh neo an ann a dh’aon ghnothach a thathas a’ leigeil le cùisean fuarachadh mun tèid èisteachd cùrtach a dhèanamh?
Am bheil an lagh lapach aig amannan? Fiù ’s nuair a cho-dhùin cùirt gun robh còir aig Comhairle Baile Ghlaschu co-ionannachd tuarastail is chòraichean obrach a thoirt dha na mnathan obrach aige, bliadhna air adhart tha an dàil a chuir e air cùisean a’ dol fhathast agus boireannaich a’ fulang ana-ceartas. Ach ma tha gliocas anns na seanfhacail, tha dòchas dha na mnathan san fhear seo. Ruigidh dàil doras. Nach math gum fosgladh sin romhpa.
IF SCOTLAND IS a last bastion of chauvinism maybe it isn’t surprising that some women are still battling for equality of opportunity and employment conditions here.
But it is surely wrong that a public body such as Glasgow City Council prevaricates when a court of law ruled that it should implement equal pay and conditions for female employees.