Beachd Ailein
THA MI A’ SGRÌOBHADH SEO air latha ceann-bliadhna shònraichte dhomh fhìn, agus tha mi ga sgrìobhadh nas tràithe nan àbhaist air sgàth ‘s gum bheil sinn a’ falbh dhan Eilean Sgitheanach airson beagan làithean.
Mar a thachair, tha ar ceann-bliadhna pòsaidh agus ceann-bliadhna ogha dhuinn ann beagan làithean ron cheann-bliadhna agam fhìn agus tha mo cheann na bhrochan eadar gach cuirm is ùpraid a th’ air a bhith dol fad na seachdaine.
Tuigidh sibh gur e làithean toilichte a tha seo dhuinne mar theaghlach. Ach ged a bha an t-seachdain seo cudromach, chan urrainn dhomh gun a bhith a’ beachdachadh air an naoidheamh latha fichead den Mhàrt anathbhliadhna agus sgaradh oifigeil Bhreatann bhon Aonadh Eòrpaich. Ged a tha luchd-poilitigs air a bhith a’ bleith an cuid theangannan mun seo fad ùine mhòr agus na meadhanan naidheachd a’ togail an cuid cheistean is bheachdan fhèin air cùisean, saoilidh mi gum bheil mòr-shluagh na dùthcha gu math mì-shoilleir fhathast mun bhuaidh a bhios aig Brexit air ar beatha làitheil.
Agus tha ceann-latha an dealachaidh a’ teannadh oirnn glè luath! Gun teagamh tha an gluasad seo dol a chiallachadh barrachd dha cuid de ghnìomhachasan na dùthcha seach feadhainn eile ach saoilidh mi gun toir lùghdachadh sam bith air teachd-asteach na rìoghachd buaidh, agus gu h-àraidh aig àm far am bheil ionmhas poblach agus maoin leasachaidh air a bhith cho gann fad bhliadhnaichean.
Chan eil e gu diofar cò an taobh a sheallas tu feadh nan sgìrean as iomallaiche den dùthaich chithear rathaidean is goireasan de gach seòrsa nach biodh idir ann às aonais taic ionmhais Eòrpach. Cha b ‘iongnadh mar sin ged a bhiodh iomagain mhòr feadh nan coimhearsnachdan sin gu sònraichte a thaobh na tha an dàn nuair a sguireas na sruthan ionmhais sin. Fhad ‘s a tha gnìomhachas an iasgaich air seachd fadachdan fichead a
ghabhail a’ feitheamh ri leithid seo de sgaradh gus smachd às ùr fhaotainn air a chuid làraich iasgaich tha ceist air leithid gnìomhachas an àiteachais ach am bi an Riaghaltas air chomas, neo fiù ‘s deònach, na h-aon ìrean taice a chumail ris-san?
Le dealbh car mì-shoilleir agus beagan dubhach a’ tighinn thugam mu Bhrexit nach math gum bheil naidheachdan eile ann a tha toirt togail dhomh. Sgoil Ghàidhlig ùr Phort Rìgh deiseil mu dheireadh thall agus gu bhith a’ fosgladh an dèidh na Càisge.
Gach soirbheachadh leatha agus mo bheannachd aig an fheadhainn a rinn strì cho treun ga buinnig. Agus le Plana Nàiseanta Gàidhlig ùr ga fhoillseachadh feumaidh sinn a bhith misneachail air adhartas leasachaidh dhan chànan thar na còig bliadhna romhainn.
BRITAIN will officially leave the EU on my birthday in 2019, and I’m not sure that it will be a present that I welcome.
I do warmly welcome news that Portree’s new Gaelic-medium school will open after the Easter break, and best wishes to staff and pupils. Best wishes also for the realisation of the aspirations of the 2018-23 National Gaelic Language Plan published last week.