Beachd Ailein
Bidh cuimhne aig cuid agaibh nuair a thòisich am prògram Aithris na Maidne air Rèidio nan Eilean an toiseach, bhiodh iomradh ga chraoladh air na leanabanan a bh’ air an ùr bhreith ann an ospadail nan Eileanan Siar. Sgeulachd thogarrach le dearbhadh gun robh ginealach ùr a’ tighinn.
Bha seo cuideachd ri chluinntinn air taobh an iar tìr-mòr agus bha coimhearsnachdan an sin a’ farchluais mar gum biodh air sgìre nan eilean, agus nuair a sgaoil am prògram gu ruige na Gàidhealtachd air fad cha ghabhadh leithid de fhiosrachadh a thoirt dha sgìre cho farsaing.
Gu mì-fhortanach tha sinn uile ro eòlach air fiosrachadh thiodhlacaidhean a chluinntinn gach darach a mhadainn, dearbhadh gun do chailleadh sàr Ghàidheal neo bana-Ghàidheal eile agus cha b’ iongnadh ged a bhithte a’ caoidh a’ chall dhan dualchas cho math ri call an neach fhèin a th’ air falbh.
Tha argamaid ann gum bheil leithid seo de fhiosrachadh air Rèidio nan Gàidheal, feumail agus gum bheil e, gu ìre fo-mhothachail ag innse dhuinn gum bheil sinn a’ call ar cuid dhaoine ‘s gun aithris sam bith air ùrachadh sluaigh gus an dealbh sin a chothromachadh.
Canaidh cuid gur e gòraiche tha seo agus gum bheil an t-seirbheis fiosrachaidh a tha ga lìbhrigeadh ann an Gàidhlig co-ionnan ris na tha a’ tachairt sa Bheurla. Ach feumar aideachadh gum bheil coimhearsnachd na Gàidhlig lag agus feumach air altram shònraichte gus a leasachadh.
Mar a tha Plana Nàiseanta na Gàidhlig ag aithneachadh, tha ath-bheothachadh a’ chànain anns na h-eileanan, agus anns na sgìrean eile anns am bheil freumhan aice fhathast, an urra ri òigridh a ghleidheadh le cothroman cosnaidh agus taighean a bhith anns na h-àitichean sin dhaibh.
Rinn mi toileachas mòr air an t-seachdain seo chaidh cluinntinn mu thoradh rannsachaidh a chaidh a dhèanamh feadh Uibhist agus Beinn na Fadhla a tha a’ sealltainn gum bheil àireamh nan daoine òga an sin a’ dol am meud eadar na bheil a’ fuireach an dèidh na sgoile fhàgail, na bheil a’ tilleadh le companach is ‘s dòcha clann òg a dhèanamh am beò-shlaint ann, agus cuid gun cheangal sam bith ris an àite a tha a’ gluasad ann.
‘S e dealbh mhisneachail da-rìribh a tha a’ nochdadh ged nach biodh ann ach am fiosrachadh air mar a tha buill Chomataidhean Ionaltraidh aig tuath agus deas ginealach nas òige san fharsaingeachd na bha iad deich bliadhna air ais, agus cuideachd gum bheil àireamh nan leanabanan gam breith air fàs gu mòr.
Leis an t-sluagh òg seo a’ togail na Gàidhlig agus an dualchas ‘s e fìor naidheachd a th’ ann! Tuilleadh neirt dhaibh, agus abair eisimpleir dhòchasach dha sgìrean eile! Recent research in Uist and Benbecula shows a most encouraging growth in the young economically active sector of the community.
Combined with a rise in the birth rate and an enthusiastic adoption of Gaelic language and culture this is excellent news for these islands and an exciting example for other areas.