Beachd Ailein
Bha carbadan sron earball eadar Inbhir Nis agus Drochaid an Eilean Sgitheanaich nuair a shiubhail sinn an iar air an t-seachdain seo chaidh, agus bu choma cò an taobh a ghluaiseadh tu sin mar a bha cùisean.
Trang da-rìribh le luchdturais, chun na h-ìre gu dearbh is gum bheil maille mhòr ga chur air muinntir an àite gluasad air ceann an gnothaich. Fiù ‘s air tìr-mòr bha na pàircean-chàraichean aig Caisteal Urchadain agus aig Eilean Donnain làn agus luchd-frithealaidh a’ smèideadh air falbh an tuilleadh a dh’iarradh tadhal.
Fìor dheagh naidheachd dhan fheadhainn a tha an sàs ann an gnìomhachas aoigheachd agus marsantachd san sgìre, ach mar a tha mi air a thogail iomadh uair roimhe an seo saoilidh mi gum bheil àireamhan luchd-tadhail an impis a bhith thar chomas nan goireasan a th’ ann romhpa. Cha b’ ann an dè a thòisich turasachd air Ghàidhealtachd agus tha e nise na phrìomh ghnìomhachas agus a’ cruthachadh chosnaidhean an ìre mhath fad na bliadhna. Dh’fhàg sin stiùirichean Oilthigh na Gàidhealtachd is nan Eilean a’ coimhead ri cùrsaichean agus teisteanasan proifeiseanta anns gach meang de thionnsgal an aoigheachd ach am bi barrachd cothrom aig muinntir nan sgìrean seo fhèin air beò- shlàint à turasachd.
Sin cuideachd a dh’fhàg e do-chreidsinneach gum biodh Comhairle na Gàidhealtachd a’ dùnadh ghoireasan mar taighean-beaga, seach a bhith a’ leudachadh taic dhan ghnìomhachas.
‘S e fìrinn na cùise gum bheil feum mòr air leithid sin de chosnaidhean làn-ùine le tuarastail dhòigheil gus daoine a ghleidheadh anns na sgìrean maiseach dùthchail a tha a’ tàladh an luchd-siubhail, agus tha feum cuideachd air àitichean-fuirich aig prìsean air an ruig daoine òga gu sònraichte. Le uimhir de thaighean gan cleachdadh dha luchdturais tha dìth dhachannan na thrioblaid bitheanta far am bheil turasachd làidir, agus tha seo gu h-àraid fìor air na h-iomaill.
Feumaidh coimhearsnachd fhallain cothroman cosnaidh, taighean, agus goireasan dha sluagh òg, agus far am bheil dragh leis mar a tha sgìrean iomallach a’ crìonadh tha fhios gum bheil turasachd a’ tabhann chothroman gus daoine òga a chumail anns na h- àitichean sin.
Chan eil an gnìomhachas dol a shoirbheachadh ann am fàsaichean gun shluagh neo goireasan, agus ‘s e mo bheachd gum bheil mòrfheum aig buidhnean poblach air sùil a thoirt air na seirbheisean a tha mar dhleastanas orra ma choinneimh nan cìsean a tha iad a’ cosnadh às an tionnsgal seo.
Saoilidh mi gum bheil e mì-chneasta ann an 2018 gum feum boireannaich feitheamh nan sreath air an t-sràid taobh a-mach ghoireasan thaighean-beaga phrìomh bhaile an Eilein Sgitheanaich leis nach eil an t- àite mòr gu leòr.
Highland councillors have no wish to damage the tourism industry which has become a principal economic activity of their area, so they have a duty to ensure council services positively reflect this growth.
Public toilets are the most basic provision and the sight of women queuing on the street to use inadequate facilities in Skye’s capital town is an embarrassment in 2018.