Beachd Ailein
Tha mi a’ sgrìobhadh seo is Mòd Nàiseanta Rìoghail 2018 dìreach air tòiseachadh ann an Dùn Omhain, agus bha fìor dheagh chuirm fosglaidh ann a dh’aindeoin ‘s ged a b’ fheudar a’ chaismeachd lòchran a chur dheth aig a’ mhionaid mu dheireadh.
Thàinig an stoirm Calum air tìr oidhche Dhiardaoin agus bha i fiadhaich da-rìribh tron latha Dihaoine le gaoth is uisge.
Aig an fhàilteachas a chùm An Comunn Gàidhealach aig Talla Baile Dhùn Omhain feasgar Dihaoine le aoigheachd bho Chalmac, prìomh bhuidheann goistidheachd na roinne prìobhaidich dhan Mhòd Nàiseanta, bha Ball Pàrlamaid Albannach na Sgìre Mìchael Ruiseal a’ dèanamh beagan spòrs mu na duilgheadasan a bha ma choinneamh luchdtadhail a’ Mhòid.
Eadar maoim-slèibhe air a’ phrìomh rathad a’ ciallachadh còrr air trì fichead mìle siubhail a bharrachd air an rathad neo mì-chinnt sheirbheis aiseagan, cha robh an turas idir furasta thuirt e, ach cha do chuir dùbhlain den t-seòrsa cus bacaidh riamh air na Gàidheil!
Bha e tàmailteach dhan Chomataidh Eagrachaidh gum b’ fheudar a’ chaismeachd a chur dheth an dèidh uimhir de shaothair ga deasachadh, ach cò aige tha fios nach gabh a’ chaismeachd dèanamh nas fhaide den t-seachdain, chan eil riaghailt sam bith a tha ag ràdh gum feum i bhith ann aig an fhosgladh a-mhàin.
Bha uallach sònraichte aig Mìcheal Ruiseal a bhith ag ainmeachadh cò bh’ air duais Tosgaire Gàidhlig na Bliadhna aig Riaghaltas na h-Alba a bhuannachadh, agus ann am Bliadhna na h-Òigridh chòrd e gu mòr ris na bha an làthair cluinntinn gun robh sin air a dhol gu Eilidh NicCarmaig à Port Rìgh.
Thug Eilidh taing dha Comataidh Òigridh agus Bòrd a’ Chomuinn Ghàidhealaich a bh’ air an taghadh a dhèanamh às leth an Riaghaltais agus mar a tha tur iomchaidh dha na h-uile againn a bhuannaich an t-urram seo, gheall i gun cumadh ise cuideachd ag obair gu dìcheallach às leth na Gàidhlig agus a cultar.
Bha a’ chiad chothrom aig Eilidh sin a dhèanamh mar bhall den chòmhlan bhan Sian aig cuirm fosglaidh Mòd Nàiseanta Rìoghail 2018 goirid an dèidh sin, far an cualas cuideachd an còmhlan ealanta beothail Beinn Lee le sianar òga à Uibhist a’ cosnadh moladh dùrachdach bhon luchd- èisteachd. Fìor dheagh thòiseachadh dhan Mhòd ann am Bliadhna na h-Òigridh. Mun àm a bhios sibhse a’ leughadh seo bidh cùisean a’ teannadh gu crìch seachdaine a tha mi ’n dòchas a bhios soirbheachail, taitneach, misneachail, agus adhartach dhan Ghàidhlig agus dhan na h-uile a dh’obraich cho cruaidh gus an tachartas seo a thoirt gu bith.
Despite Storm Callum, the formal opening of the Royal National Mòd 2018 in Dunoon was hugely successful, dominated by the melodic singing of the female group Sian and the stirring music of the young Uist band Beinn Li.
While a significant and appropriate message in this Year of Young People, it was also good to hear An Comunn Gàidhealach reaffirm its commitment to listen and work with young Gaelic speakers and learners. Cultural succession planning.