Beachd Ailein
’S e am beul a labhras ach ’s e an gnìomh a dhearbhas! Bidh geallaidhean tarraingeach gan tairgsinn dhuinn bho chaochladh thagraichean phoilitigeach thar nam beagan sheachdainean romhainn. Ach ’s e an dùbhlan co-dhùnadh dè na geallaidhean àraid a dh’fhaodadh ’s dòcha a bhith air an coileanadh. Tha a’ cheist dhuilich sin a’ ciallachadh gum bheil tomhas de chunnart anns a h-uile taghadh coitcheann, mar crannchur, ach gun teagamh ’s e sochair phrìseil da-rìribh a th’ anns a’ chothrom bhòtaidh agus is còir feum a dhèanamh dheth daonnan.
Feumar aithneachadh cuideachd gum bheil a’ mhòr-chuid de na tagraichean a thig air adhart a shireadh taic an t-sluaigh gus a bhith nam Buill Pàrlamaid, a’ dèanamh sin le làn-rùn cor na dùthcha a leasachadh gu ìre nas fheàrr. Bidh iad mothachail nach e obair fhurasta a tha gu bhith ann ma thèid an taghadh, agus feumaidh iad a bhith treun gu leòr gabhail ri càineadh theagamh gu math nas bitheanta na gheibh iad moladh.
’S e dreuchd urramach a th’ ann a bhith a’ riochdachadh sluagh roinn taghaidh Pàrlamaid sam bith agus tha dleastanasan cudromach an lùib na h-obrach. Bidh e fìor a thaobh gach tagraiche a shoirbhicheas gum bi iad a’ riochdachadh mòran dhaoine nach tug taic bhòt dhaibh, ach tha na daoine sin pailt cho airidh air aire agus cluas a’ Bhuill Pàrlamaid ris an fheadhainn a chuir a-staigh e neo i.
Saoilidh mi nach bi tagraiche sam bith a’ seasamh nach eil mothachail nach gabh a h-uile neach riarachadh, agus thèid iarrtasan gu math mì-reusanta thuca bho àm gu àm.
Bhiodh dùil gum bi na geallaidhean a thairg an tagraiche a bhuannaicheas taghadh gu ìre mhòr nan sgàthan air rùintean luchdbhòtaidh na roinne aig àm an taghaidh, ach feumaidh e / i sùil mhionaideach a chumail air mar a dh’fhaodas beachdan nan daoine atharrachadh rè beatha Pàrlamaid.
Cluinnear gu math tric daoine a’ gearan gum bi am Ball Pàrlamaid aca a’ bhòtadh gun mhothachadh air rùn an t-sluaigh as còir dha / dhi a bhith a’ riochdachadh, agus fàgaidh leithid sin cuid cho leamh is gun caill iad earbsa san t-siostam riaghlaidh agus gun sguir iad a bhòtadh.
Tha sin air leth tàmailteach nuair a thachras e, oir tha na daoine sin a’ trèigsinn na saorsa agus a’ chothrom shònraichte a th’ aca ann an dùthaich dheamocratach.
Chan eil farmad sam bith agam fhìn ris na Buill Pàrlamaid ach tha mi glè thoilichte gum bheil daoine comasach ann a tha deònach seasamh agus earbsa a chosnadh bhuainn. Ge b’ e dè an taobh a dh’iarras sibhse bhòtadh tha mi ’n dòchas gun dèan sibh sin, agus tha mi ’n dòchas cuideachd gun tig na geallaidhean a fhuair sibh gu buil agus gu math na dùthcha gu lèir!
Promises mean nothing until delivered and, while that truth makes voting in any election a matter of trust, and risk, the opportunity to make your choice is a precious privilege. Use it.