Beachd Ailein
ailean@obantimes.co.uk
Tha seanfhacal ann a tha ag ràdh gum bheil adhaircean mòra air crodh tha fad’ às! Dhòmhsa co-dhiù tha sin a’ ciallachadh nach eil na tha ga aithris a rèir fìrinn na sgeòil agus gum bheil oidhirp ga dhèanamh luchd-èisteachd a mhealladh. Chan eil teagamh nach eil leithid seo de chleachdadh mhì-onarach a’ tachairt bitheanta far am bheil eucoraich a’ feuchainn ri bathar a reic nach eil da-rìribh a rèir na h-ìre, neo an luach, a thathas a’ sanasachd, ach tha tomhas den aon seòrsa rud bitheanta cuideachd ann an saoghal phoilitigs far am bi geallaidhean dùrachdach gan toirt nach eil gan coileanadh.
’S cinnteach gum bi bhur taghaidhean fhèin den seòrsa gheallaidhean poilitigeach briste sin aig a’ mhòr-chuid agaibhse, ach theagamh gun aontaich sibh gum bheil cuid nas miosa na chèile. Sin a’ bheachd a ghabh mi a’ leughadh bhriathran cheannard buidhinn a tha strì às leth dhaoine feadh Alba a tha gun dachaigh. Tha e sgìth ag èisteachd ri beulbrèagha is geallaidhean, agus tha e ag ràdh gum bheil e deatamach gun tèid taighean a thogail gun dàil is urrainn dha na mìltean, agus mòran chloinne nam measg sin, a tha gun dachaigh fhaotainn air mhàl.
Saoilidh mi gum bheil sinn a’ cluinntinn phàrtaidhean poilitigeach de gach seòrsa ag innse dhuinn gun cuimsich iad gu sgiobalta air an dùbhlan seo ma gheibh iad comas riaghlaidh, agus tha e da-rìribh draghail san latha sam bheil sinn beò a bhith a’ leughadh gun do bhàsaich còrr air dà cheud gu leth air sràidean Alba ann an 2020 ri linn dìth àite-còmhnaidh freagarrach. Le mìltean thaighean gan togail feadh na dùthcha gach bliadhna, dè idir as coireach nach eil a’ bheàrn chudromach seo anns a’ mhargaid ga leasachadh. Far am bheil cor fheadhainn gun dachaigh air cogais an riaghaltais, gun ghuth air a bhith nan dleastanas dha, agus far am bheil smachd aige air maoin calpa agus cead-dealbhachaidh nach saoileadh tu gun gabhadh cùmhnantan cur air dòigh le buidhnean togail gun chus duilgheadais.
’S e casaid anabarrach dha-rìribh a bhiodh ann air riaghaltas, agus gu dearbh air pàrtaidhean poilitigeach gu lèir, a ràdh gum bheil iad a’ cur nas lugha chuideam air dìon dhaoine a dh’fheumas cadal air a’ bhlàr-a-muigh na tha iad a’ toirt dha iomairtean eile. Chan iongnadh Fasgadh Alba bhith a’ comharrachadh gum bheil gainnead thaigheadas sòisealta ann an Alba na shuidheachadh èiginneach, agus na thoradh air bliadhnaichean anns nach deach faisg gu leòr maoin a chur dhan raon chudromach seo.
Gun teagamh tha uallaichean agus dleastanasan air feadhainn eile cuideachd san t-suidheachadh, leithid feadhainn a tha a’ leigeil àitean-fuirich air mhàl, ach cha bhi e idir gu leòr dha riaghaltas tuilleadh maille a dhèanamh fhad ’s a tha sgrùdaidhean is conaltradh a’ gabhail àite. Tha an èiginn seo a’ tachairt an-dràsta!
Le còrr air seachd mìle gu leth pàiste gun dachaigh bhuan an ceartuair tha feum gluasad gu grad gus an suidheachadh maslach seo a cheartachadh!