Beachd Ailein
Aig àm sgrìobhaidh seo tha còrr air millean a’ sireadh tèarmann ann an dùthchannan nàbachd na Ucràin, agus fir de gach aois a’ sabaid a dhìon bhon ionnsaigh aig an Ruis. Abair gluasad air saoghal mhuinntir na Ucràin ann an ùine ghoirid, agus abair truas an t-saoghail! Chan iongnadh daoine ann an dùthchannan an taobh an iar a bhith a’ faireachadh cho lag is cho tàmailteach nach eil barrachd cobhair ga thoirt dhan Ucràin, agus Putin gu follaiseach a’ gabhail brath air an eagal a th’ air buill NATO agus an UN bho chogadh niuclasach.
Ach am bheil amas aig Putin an seo? Dè a’ chiall a th’ ann bailtean agus goireasan na dùthcha seo a sgrios? Am bheil e idir ag aithneachadh gum feum an sluagh àitean-còmhnaidh fiù ’s ged a bhuannaicheadh e na ionnsaigh mhì-chiatach?
Chan iongnadh gum bheil luchd-naidheachd is eile a’ toirt sùil air ais air cuid de na h-ionnsaighean a rinn An Ruis air dùthchannan a nàbachd aig àm an Dàrna Cogaidh, agus às dèidh dha crìochnachadh. Ged a chaidh aig an Fhionnlainn air a saorsa a ghleidheadh chaill i cuid de a fearann anns a’ chreach a rinn An Ruis oirre, agus tha e follaiseach gum bheil an-fhois air daoine an sin a-nise gum faodadh Putin tionndadh orra an dèidh dha crìochnachadh sa Ucràin. Ged a tha gach dùthaich ann an nàbachd na Ucràin air a bhith ro dheònach cuideachadh a thoirt dhan fheadhainn bhon Ucràin a tha a’ sireadh tèarmann tha a’ Phòlainn air a bhith sònraichte èasgaidh agus coibhneil. Theagamh gum bheil cuid den adhbhar stèidhichte air aithne air mar a dhèilig An Ruis ris an dùthaich sin an dèidh an Dàrna Cogadh.
Ann an 1986 chaidh mise dhan Phòlainn ann an cuideachd seann shaighdearan Gàidhealach a chaidh a ghlacadh leis na Gearmailtich aig Saint Valery san Ògmhios 1940 agus a chaidh a chur nam prìosanaich cogaidh gu ruige na Pòlainn. Bha dealbh aig Dòmhnall Ailean Lachlainn dheth fhèin is Ruairidh Dhòmhnaill Eachainn agus Eàirdsidh Ruairidh, a chaidh a gabhail san togalach san robh iad nam prìosanaich, agus bha ùidh aig an triùir aca Shenvalde a lorg a-rithist. Rinn sinn sin, ach cha b’ ann gun strì oir fhuair sinn a-mach gun robh An Ruis air ainm gach baile atharrachadh mu thimcheall 1947 agus cuideachd air sluagh gach sgìre a ghluasad mu cheud mìle bhon àite san robh iad, rud a bha a’ ciallachadh gun robh eòlas agus eachdraidh gach coimhearsnachd a’ tòiseachadh an dèidh a’ chogaidh!
Nach b’ annasach an fheallsanachd phoilitigeach a dh’iarradh fèin-aithne dhualchasach an t-sluaigh a thoirt bhuapa, cha robh duine ris an do choinnich sinn aig an robh eòlas sam bith air eachdraidh neo fiù ’s ainm Schenvalde! Ma ’s e sin pàirt den innleachd a th’ aig Putin bidh ceannach gu math daor aige air oir tha sluagh na Ucràin deònach sabaid gu bàs gus saorsa a ghleidheadh! Tha sinn a’ guidhe nach fheudar leithid de dh’ìobairt tachairt!