Beachd Ailein
’S è àm car sònraichte a th’ ann an deireadh a’ Mhàirt dhuinne mar theaghlach is caochladh chinn-bliadhna gan comharrachadh faisg air a chèile agus bidh sinn a’ gabhail cothrom cruinneachadh gus ùine thlachdmhor a chur seachad còmhla.
Am-bliadhna tha aimsir ghlòrmhor air loinn a chur air na cothroman sin agus abair gun do chòrd na tachartasan uile rinn! Tha dreach an Earraich air tighinn an cois na grèine, agus tha blàth eireachdail a’ boillsgeadh air craobhan ubhal is sirist thall ’s a-bhos a’ fuadach dubhachd geamhraidh agus a' toirt togail air spiorad is inntinn.
Cha tig fuachd chun tig Earrach a rèir rabhadh seanfhacail, ach ged a tha beagan reothaidh anns na h-oidhcheannan fhathast tha daoine a’ dèanamh fiughair ri àm cuir sìl de gach seòrsa, agus an dòchas a leanas airson toradh fàbharach air saothair an cuid obrach.
Air uachdar na bheil an sin de mhisneachadh thar bheagan làithean bho chionn ghoirid, bha cuideachd Latha Sàbaid Màthaireachd a’ tachairt aig am aon àm, agus chan eil teagamh nach d’ rinn bùithtean reic fhlùraichean fìor mhath! Agus cò againn nach biodh ro thoilichte aithne agus taing a roghnachadh dha ar màthair ma tha i fhathast beò, neo cuimhne bhlàth a chomharrachadh oirre mur eil i ann tuilleadh. Tha e doirbh dad den sin a dhèanamh am-bliadhna gun smaoineachadh air a liuthad màthair feadh an t-saoghail a tha fo bhròn is i air ball de a teaghlach a chall, is sin gu sònraichte fior a thaobh na Ruis is na Ucràin.
An dèidh a’ bhlàir thig an t-sìth their an seanfhacal, ach gu mì-shealbhach ’s e dìleab bròin agus caoidh a bhios aig mòran dhachannan an dèidh leithid a’ bhlàir seo, nach do thòisich iadsan is air nach robh iarraidh aca, ach a bhuin gu cruaidh agus olc riutha. Nach truagh mar a tha an suidheachadh far am faigh deachdaire mar Vladimir Putin cothrom sgrios do-chreidsinnich a thoirt air dùthaich na nàbachd is nach eil na dùthchannan cumhachdach a tha ga chronachadh air chothrom stad a chur air. Cha leig eagal cogaidh mòr niuclasach leotha dad a dhèanamh ach ionnsaighean eaconamach tro chaochladh chasgan malairt, agus ged a tha sin mar-thà a’ toirt buaidh a rèir aithris, fhad ’s a tha e a’ tachairt tha bailtean na Ucràin a’ dol nan smàl agus sean is òg a’ bàsachadh. Ged a tha mòran còmhraidh aig eòlaich air mar nach eil amasan na Ruis a’ tighinn gu buil mar a bha Putin a’ cur roimhe, ’s fhurasta cuideachd tuigsinn mar a tha cuid air an sìor leamhachadh leis nach gabh bacadh a chur air ionnsaigh na Ruis, is Putin a' gabhail brath air sgàig dhùthchannan NATO agus an UN.
Chan e a-mhàin nach eil fios cuin neo ciamar a thig crìoch air an aimhreit seo, neo an tig idir a’ chiad ghreis, ach tha an t-olc a tha a’ tachairt gach latha a’ dearbhadh dhuinn gu soilleir gum faodadh an aon seòrsa rud tachairt a-rithist!
Allan Campbell, ailean@obantimes.co.uk