Beachd Ailein
Mas math leat do mholadh, faigh bàs: mas math leat do chàineadh, pòs! Bha ceist agam mun t-seanfhacal seo bho chuala mi an toiseach e! Gu cinnteach tha mòran nach eil beò a choisinn càineadh, a cheart cho cinnteach ’s a tha feadhainn a tha beò airidh air moladh. ’S e fear de na rudan a bhios gam fhàgail fhìn tric searbh mu luchd-poilitigs, na bhios iad a’ cur seachad den cuid ùine a’ cur sìos air buill Phàrtaidhean eile. Nan dòighean eadar-dhealaichte fhèin tha fhios gum bheil a h-uile Ball Pàrlamaid air rudeigin feumail a dhèanamh agus tha iad airidh air aithne airson sin. Gun iomradh air Pàrtaidh, nuair a tha tagraichean gan cur fhèin air adhart aig àm taghaidh cluinnear iad ag ràdh gur e math an t-sluaigh prìomh dhleastanasan “riochdairean” sa Phàrlamaid, gu sònraichte seirbheisean slàinte, foghlam, còmhdhail, agus dìon. Saoil, ma tha, an e comharra air tanalachd an cuid feallsanachd phoilitigeach fhèin a tha a’ fàgail, nuair a gheibh cuid aca a-staigh, nach cluinnear sa mhòr-chuid bhuapa ach càineadh mì-mhodhail air feadhainn eile! Nuair a nochd Nicola Sturgeon gun robh i a’ leigeil dhith Ceannas Phàrtaidh Nàiseanta na h-Alba agus dreuchd Phrìomh Mhinistear Phàrlamaid na h-Alba, bha na caochladh bheachdan a dh’fhoillsich Ceannardan nam Pàrtaidhean eile mu thè a bha, le roghainn luchd-bhòtaidh, air còrr air fichead bliadhna a ghleidheadh aig àrd ìre ann am poilitigs na h-Alba, ag innse barrachd mun deidhinn fhèin na ma deidhinnse!
Gu fàbharach bidh an taghadh airson Ceannard ùr dha Pàrtaidh Nàiseanta na h-Alba goirid taca ris a’ phròiseas shlaodach, sgriosail, airson ceannas nan Tòraidhean agus Prìomhaire Bhreatainn. Ach fiù ’s aig àm sgrìobhaidh seo, is tagraichean dìreach a’ tòiseachadh ri nochdadh, tha nam bheachd-sa cunnart ann gun tèid geallaidhean a dhèanamh a bhios doirbh an coileanadh. Mar eisimpleir tha aon tagraiche mar-thà air gealltainn ma bhuannaicheas ise gun tòisich obair-leasachaidh rathad an A9 sa bhad! ’S fhurasta thuigsinn gun cuireadh mìltean fàilte air leithid de ghluasad an dèidh ’s mar a chaidh an Riaghaltas Nàiseantach air ais air geallaidhean an t-slighe eadar Peairt agus Inbhir Nis a dhùblachadh mu 2025! Chaidh taghaidhean prìomhachais a dhèanamh air mar a rachadh ionmhas calpa an sàs thar nam bliadhnaichean mòra bhon chaidh an leasachadh deatamach seo a ghealltainn, ach saoilidh mi gur e da-rìribh gainne airgid calpa a dh’fhàg nach deach ceum air choreigin a ghabhail bho chionn ghoirid mar chomharra air cogais riaghaltais. Co às mar sin a bhiodh ionmhas ùr ga lorg ann an seasamh nam bonn? Bhiodh e sgreataidh nan d’ rachadh an tuilleadh maille mar eisimpleir air leasachadh sgoiltean, tha staid thogalaichean sam bheil cuid de chloinn gam foghlam na mhasladh! Chan urrainn gum bheil seòmraichean fuar is fuaraidh nam bunait iomchaidh foghlam a liubhairt, neo fhaotainn, ann an tè de na “dùthchannan as beartaiche san t-saoghal”? Bhithte an dùil tagraichean airson uallach Prìomh Mhinistear na h-Alba a bhith mothachail nach eil staid, neo ìre, phrìomh sheirbheisean poblach na dùthcha a’ dearbhadh leithid de chunntas!