Beachd Ailein
Ged a leugh mi an leabhar iomraiteach 1984 aig Seòras Orwell bho chionn iomadh bliadhna, agus a chòrd e rium gu mòr, feumaidh mi a ràdh nach eil leabhraichean neo filmichean scì-fì idir a’ tighinn rim chàil agus bidh mi gan seachnadh.
Ach ann a bhith a’ leughadh agus ag èisteachd naidheachdan an t-saoghail bho chionn ghoirid tha e follaiseach gum bheil comasan tuigse innealta (artificial intelligence) a’ fàs chun na h-ìre ’s gum faodadh gun caill mac an duine smachd air! Chan e bruadar a tha seo tuilleadh a rèir choltais, ach trom-laighe gu math iargalta agus far am bheil eòlas is tuigse fuadain a’ tighinn gu ìre ealantais a leigeas leis ceistean aithneachadh, co-dhùnaidhean a dhèanamh air freagairt, agus sin an uairsin a chur an gnìomh gun chead bho dhuine beò.
Tha e fìor a ràdh gum bheil innealan mìorbhaileach an sàs anns a h-uile seòrsa gnìomhachais feadh an t-saoghail an-diugh, agus ged a tha iad sin air milleanan de luchdobrach fhàgail iomarcach tha an uidheamachd anns an fharsaingeachd a’ ceadachadh toradh obrach mòran nas motha. Ach ’s e rud a tha cudromach gum bheil na h-innealan sin ag obair fo smachd dhaoine ris am bheil e an urra an stiùireadh, agus ’s e an dragh a tha a’ nochdadh a-nise gum bheil innealan a’ fàs comasach air “smaoineachadh” agus gnìomhan a chur air adhart leotha fhèin.
Aig àm far am bheil a’ chiad bhus às aonais dràibhear air tòiseachadh air slighe thar Drochaid Fhoirthe, eadar Aiseag na
Banrighinn agus Dùn Èideann, theagamh gum bheil e nàdarra gu leòr gum bitheamaid a’ gabhail am barrachd aire dhan ìre ’s gum bheil teicneòlas a’ riaghladh ar dòigh-beatha.
’S coma co-dhiù tha sinn a’ sgrìobhadh teacs air fòn-làimhe neo a’ deasachadh bìdh anns a’ chidsin tha sinn an eisimeil ghoireasan ris am bheil sinn air fàs cho cleachdte agus gum biomaid air chall às an aonais. Chan e sin a-mhàin ach tha sinn cuideachd daonnan air ar tàladh gu fiù ’s tuilleadh ghoireasan a bhios a’ gealltainn barrachd saorsa bho obair sgìtheil, agus tha innleadairean an teicneòlais a’ sìor amas air cur ri comasan an cuid innealan.
Bha seo air fhoillseachadh ann an seann sgeulachd Frankenstein, agus saoilidh mi gum bheil cuid den fheadhainn a tha an sàs ann an obair tuigse innealta gar rabhadh gum faodadh an aon seòrsa ceann-uidhe a bhith aig cuid den cuid obrach mur a bithear faiceallach.
’S e saoghal ciùil aon raon sam bheil an tuigse innealta air comasan iongantach a dhearbhadh, le clàran brèige air nochdadh nach aithnichte bho na seinneadairean air am bheil an teicneòlas ag atharrais. Adhbhar iomagain dha luchd-ciùil phroifeiseanta a tha a’ cur ùine agus saothair mhòr ann an deasachadh òrain agus fuinn, agus iad a’ faicinn a’ chunnart gun d’ rachadh an cuid obrach a ghoid! Dha mo leithid fhèin nach dèan seinn, tha e car tarraingeach smaoineachadh air clàr nam ainm ’s mi a’ seinn mar Calum Ceanadach!