The Press and Journal (Aberdeen and Aberdeenshire)
Mark Findlater is an Aberdeenshire Cllr for the Troup Ward in Banff and Buchan and one of Doric TV’s Doric Champions
Aye aye folks, fit like?
I hiv been switthering aboot fit tae write aboot next in es column, I hiv been fair enjoying aa o thay offerings ower es last file and they hiv covered an affy lot o different subjects.
I wis hinking aboot haen a news on ma favourite Doric words that hiv been pinched fae thay French leid. We aa cain that a rooser is a watering can but div ye cain that the French verb arroser means to water.
Ivvery fairmhoose I can mine on hid a puckle o ashetts, muckle great plates that hid pride o place in e middle o thay dresser.
I div hae an image in ma heid o bloo an fite ashetts reamed fu o roast beef an turkey fae fan I wis a loon. Une grande assiette is a big plate in French.
I hiv also heard an aul fairmer caa a tattie a “pomme” fae “pomme de terre”. I wud be interested in yer thochts on es, an fit wye it came aboot.
Anither hing I thocht aboot yappin on es een o ma heroes fae local history.
Noo I div hae an affy rare book by thay screever James Godsman aa aboot thay Parish o King Edward. I hiv laint it oot tae ither folk an say far hiv aye got it back, so jist speer.
In es book there is a wee story aboot a quine that I hid nivver heard o afore, Isabella Macduff, wife o Robert the Bruce’s mortal enemy John Comyn, the Earl of Buchan, fas castle wis at King Edward.
Noo the right of croonin Scottish kings wis heredity tae thay faimily o Macduff an unlike her breether Duncan, the 11th Earl o Fife, was fair trikket wi Bruce’s cause.
So in 1306 she claimed the right tae croon Bruce at Scone.
If ivver you fancy a look at far the castle wis , there is nae muckle left for the masoned steen wis used to big a brig an bits o Castleton Fairm, there is a wee picnic area at Castleton, Sooth o King Edward, far ye can stop.
Ye can then tak thay pathy doon an ye can see far Isabella louped up on tae een o her man’s war horses wi a body o retainers an made her wye doon tae Perth.
For aa o her travails she got doon air twa days ower late, bit for her loyalty she was geen the opportunity to pit the croon on Bruce’s heid again.
Noo King Edward I wis fair fizzing aboot aa o es gaun on an Isabella Macduff wis chaset an teen a hud o by the English.
Edward I ordered her locket in ower a wicker cage an hung ower e side o Berwick Castle. Here she bade for siven ear till she wis rescued on the 28th of April 1313.
She is caint in history as the “caged lady o Buchan”.
Hope ye foon it interesting, hud gaun abody.