‘Fear a’ Bhàta’ – agus abair bàta . . .

B’E latha eachdraidheil agus inntinneach a bh’ ann nuair dh’fhosgail a’ Bhanaphrionnsa Anna an Tèarmann Mara, am Marina, ann an Loch nam Madadh. An làthair bha an t-Iarla Granville, a tha càirdeach dhi, an t-ogha beag aige Eòsaph Levison Gower, Gus MacAmhlaidh, ceannard Chomann na Mara, clann sgoile agus pìobairean. Sheinn Mòrag NicNeacail Feara’Bhàta, Pòl MacCaluim Cearcall a’ Chuain, chluich Anna NicIain air a’ chlàrsaich, agus sheinn Dòmhnall MacIllleathain, Dòmhnall Aonghas MacIllinnein agus Iain Aonghas MacFhilip trì rannan de Shalm 107 ’s iad a’ cur a-mach na loidhne. Fhuair a’ Bhanaphrionnsa beagan de bhogadh ann an Gàidhlig. Thuirt i gun robh a-nis cothrom aig sgothan-seòlaidh tadhal agus fuireach ann an Loch nam Madadh far a bheil acarsaid cho math ’s a gheibhear air an taobh an-iar.

Mar thoradh air an Tèarmann, tha am bàta cuairt-mara an Corinthian a’ dol a thadhal. Sann le companaidh ann am Boston a tha i. Bidh i toirt leatha á Ameireaga daoine beartach a tha air an dreuchdan a leigeil dhiubh.

Bidh an Corinthian air acair ann am bàgh Loch nam Madadh. Thig an luchd siubhail air tìr thairis air pontoons a stèidhich Comann na Mara. Thèid iad air feadh an eilein le airgead ’nam pòcaidean, air an treòrachadh le feadhainn aig a bheil mion-eòlas air an àite. Gach oidhche bhios i aig cala, thèid seinneadairean ’s cluicheadairean a-mach ’s bidh cèilidhean agus Gàidhlig air bòrd.

Tha Seumas MacLetchie á Solas air fhastadh leis a’ chompanaidh air son àiteachan freagarrach air feadh Bhreatainn a lorg far an stad an Corinthian. Thagh e Loch nam Madadh, agus is esan gun teagamh, ann am barail nan Uibhisteach, “Fear a’ Bhàta”. TORMOD E DÒMHNALLACH