Tha cruaidh feum air deasbad a tha nas socaire
Ma bha duine sam bith ag èisteachd ris an Dr Hilary Cass agus i a’ bruidhinn aig Comataidh na Slàinte ann am Pàrlamaid na h-alba Dimàirt, ghabhadh iad f ìor iongnadh gun robh cuid a’ cur às a leth gu bheil i mì-phroifiseanta agus mì-chothromach mu thimcheall a cuid obrach.
Bha i ciallach, reusanta agus fiosraichte, mar a shaoileadh thu bho a h-eachdraidh chliùiteach phroifiseanta. Ach ann am poileataigs na h-alba an-dràsta, far an e èigheach is gràin a tha a’ cunntadh nas motha na càil eile, chan eil duine air an cùmhnadh.
Bha cuid ga càineadh bhon a thuirt i ann an sgrùdadh oifigeil gum bu chòirear a bhith nas fhaicealaiche mu bhith a’ toirt seachad leigheis dha daoine òga airson an gnè atharrachadh.
Coltach ris a’ mhòr mhòr chuid dha daoine eile, tha mi an amharas, chan eil cus eòlais agam-sa air a’ chuspair, ach tha e soilleir gu bheil cunnartan an lùib a’ ghnothaich seo ann an eanchainnean òga a tha fhathast a’ fàs agus a tha fhathast a’ lorg àite san t-saoghal, agus an iomadach cuideam a tha ma choinneamh sin.
Le m’ aineolas mar a tha, tha mi ro thoilichte fhàgail aig eòlaichean mar Dr Cass, ach ‘s cinnteach gun urrainn dhan deasbad mu thimcheall a bhith air a chumail ann an dòigh nas bàidheile agus gun a bhith cur às leth dhaoine gu pearsanta.
Tha e reusanta gu leòr an dà thaobh dhen seo fhaicinn, agus tha mi an amharas gur ann mar sin a tha a’ mhòr chuid againn – mothachail gum faodadh cunnartan a bhith lùib atharrachadh ghnè, gu h-àraid ann an òigridh, ach aig an aon àm, gabhail ris gum faodadh barrachd a dhèanamh airson taic a chumail ri daoine a tha a’ faireachdainn gu bheil iad glaiste anns a' bhodhaig cheàrr. Chan eil rian nach eil sin duilich gabhail ris agus bu chòir truas a bhith riutha.
Le cho ìosal ‘s a tha poileataigs ann an Alba air a dhol, ‘s dòcha gum faodadh dùil ris an deasbad air atharrachadh ghnè a bhith cho suarach, le gach taobh a’ slàraigeadh air a chèile, agus e buileach nas miosa ma bheir thu sùil air cuid dhe na tha a’ dol air na meadhanan-sòisealta.
Ged a tha faireachdain làidir air gach taobh, bu chòirear a ràdh – gu socair – gur e an dearbh fheadhainn a tha a’ fàs cho fiadhaich mu dheidhinn, an aon fheadhainn a tha a’ deanamh na h-uimhir a' chroin, agus tha sin cho f ìor mun argamaid aca fhèin agus a tha e mu dheidhinn càil sam bith eile. Agus tha sin f ìor air gabh taobh.
An là às dèidh dha Dr Cass nochdadh air beulaibh na comataidh, ghabh Iain Swinney a-nall mar a’ Chiad Mhinistear, le gealladh gun toir e air adhart poileataigs ùr nas coibheile agus nas còire.
Le bhith ag ràdh sin, cha robh mòran choltais fiù
‘s air a fhèin gun robh e cinnteach gun seasadh e. A’ cuimhneachadh mar a bhiodh e fhèin ag èigheach, ‘s a’ bualadh a bhoisean, is a' crathadh a mheuran ri taobh Nicola Sturgeon, ‘s dòcha gu bheil adhbhar a bhith teagmhach.
Ach tha cothrom ann cùisean ùrachadh agus
’s e sin a tha an sluagh ag iarraidh agus a’ cur feum air.
Ach chan eil fhios am am bu chòirear gealladh ro mhòr a chur air.