PCC yosimudzira varimi vefodya

Kwayedza - - Nhau Dzevarimi - Abel Ndooka

KAMBANI huru inogadzira fodya yemidzanga munyika muno yePacific Cigarette Company (PCC) - iyo yaimbozivikanwa kare nezita rekuti Savanna Tobacco Company - inoti iri pakati pekuita hurukuro neChina Tobacco Shaanxi Industrial Corporation (CTSIC) nechinangwa chekuita mushandirapamwe wekusimudzira varimi vefodya muZimbabwe.

Chinyorwa chakabva kuPCC chinoti chibvumirano chemushandirapamwe pakati pekambani iyi neCTSIC chinotarisirwa kunyoreranwa pasi nemusi weChishanu chino.

PCC yakavambwa muna 2002 uye inoti inoshanda nevarimi vefodya vanodarika 85 000 avo ine makondirakiti navo.

Varimi ava ndivo vachasimudzirwa pasi pemushandirapamwe wePCC neCTSIC nechinangwa chekusimbaradza mabasa ekurima munyika.

Kambani yePCC ine mimwe mipanda iri kuSouth Africa neZambia.

“Chibvumirano ichi chichaona kari kekutanga kambani huru inogadzira fodya yemidzanga yekuChina ichishanda nekambani inobva muAfrica.

“Kutaura kuno vamiriri veCTSIC iyo iri kuXi’an, kupurovhinzi yeShaanxi kuChina vakauya munyika muno kuzosainirana pasi chibvumirano ichi,” inodaro PCC.

Kambani yeCTSIC ine vashandi vanodarika 5 000 uye inogadzira midzanga yefodya inosvika 85 bhiriyoni pagore roga-roga.

Vamiriri vekambani yePacific Cigarette Company neveChina Tobacco Shaanxi Industrial Corporation vari kumahofisi ePCC muguta reHarare svondo rino.

Newspapers in English

Newspapers from Zimbabwe

© PressReader. All rights reserved.