Mugodhi wakadirwa suweji nemamonya

Kwayedza - - Front Page - Kingstone Mapupu

VAGARI vemumusha wekuChigwende Phase 3, kuUshewokunze, muHarare, vari kushamisika nezvakaitwa nemamwe “mamonya” nguva pfupi yadarika apo chikwata chevarume vanonzi vakaenda paimwe imba yeko ndokusvikodira tsvina yevanhu, mapamper akashandiswa nezvimwe zvinosemesa mumugodhi unocherwa mvura yekunwa neveruzhinji.

VaChenjerai Maduma (49), avo vanova sachigaro weboka rinoona nezvebudiriro munzvimbo iyi, vanoti mvura yemumugodhi uyu ndiyo inoshandiswa nevanhu veko sezvo mimwe yacho yakapwa.

Mugodhi wakadirwa tsvina uyu uri panhamba 1511 Chigwende Phase 3.

“Tine vemhuri vaigara pamba pane mugodhi uyu avo vakazongotama uye vave kugara kune imwe imba muno apo vakangosiya vakiya dzimba. Mhuri iyi ichangobva, pakazouya mamwe mamonya vaine rori nemigomo yaiva izere tsvina ndokuidira mumugodhi uyu vanhu vakayeva,” vanodaro VaMaduma.

Vanoti hapana ati aziva chikonzero chekuti sei mhuri yaimbogara pamba apa yakatama.

“Varume ava vaidarika gumi uye vakauya nerori vaine migomo yainge izere netsvina yevanhu inofungirwa kuti vakanotora kumasuweji ekumapurazi kunorasirwa suweji nekanzuru kuBudiriro, Glen View nekuMufakose. Ndiyo yakadirwa mumugodhi uyu,” vanodaro.

Kunze kwetsvina, VaMaduma vanoti varume ava vakakanda zvakare mapamper akashandiswa mumugodhi uyu.

“Ini nevamwe tinoshandisa mvura iyi takaedza kuvabvunza kuti vaiva vanaani uyewo kuti vakanga vatumwa nani nechinangwa chipi, asi havana kupindura kunze kwekutivhundutsira vachida kutirova. Hatina kumhan’ara nyaya iyi kumapurisa eZimbabwe Republic Police (ZRP),” vanodaro.

Mhuri dzinoshandisa mvura yepamugodhi uyu dzinonzi dzinodarika makumi maviri.

“Tichitaura kudai, mvura yemumugodhi uyu yazara honye, haichashandisika uye ndiwo mugodhi usingapwe muno,” vanodaro.

Vincent Mutandwa (20) anogarawo munzvimbo iyi anoti vave kutyira kunyuka kwezvirwere zvemanyoka secholera.

Egster Mugabe (26) mumwewo wevanhu vari kutsutsumwa nekuda kwenyaya iyi.

“Muno hatichageza kana kuwacha chaiko nekuda kwekushaya mvura, vamwe vave kugumisira voenda kurwizi rwaMukuvisi izvo zvine njodzi zvakare panyaya yeutano sezvo mvura yeko isina kuchena,” anodaro.

Sekai Chasaya (34) anove muvakidzani wepamba pane mugodhi wakadirwa tsvina anoti vakuvara nekutsiga migomo yemvura vachibva nayo kure.

“Tave kutyira kuti tsvina yakaiswa mumugodhi uyu ichafamba nepasi yogumawo yazoipisa mimwe migodhi yemuno kana yazova nemvura munguva yekunaya. Tave kutyirawo zvirwere,” anodaro.

Kuchiti Paidamoyo Munyumwa (20) anoti nyaya yetsvina yakadirwa mumugodhi uyu inofanirwa kumhan’arwa kumapurisa nhubu dzakaita izvi dzotsvagwa.

Chenjerai Maduma achitaridza mapamper akashandiswa ayo akakandwa mumugodhi wemvura

Mugodhi unonzi wakadirwa tsvina yevanhu - Mifananidzo naTariro Kamangira

Egster Mugabe

Sekai Chasaya

Newspapers in English

Newspapers from Zimbabwe

© PressReader. All rights reserved.