UNICEF yobatsira nePPE
SANGANO reUNICEF rinoti rabatsira nezvinhu zvinosanganisira mamasiki nemagirovhosi zvinosvika matani 16 zvevashandi vezveutano izvo zvakananga kubatsira mukurwisa kupararira kwehutachiona hwecoronavirus uho hunokonzera chirwere cheCovid-19.
Muchinyorwa, UNCIEF inoti zvinhu izvi zvakatoendeswa kumatunhu ose enyika.
“UNICEF Zimbabwe, kuburikidza nemuzinda wayo weGlobal Supply Hub uyo uri kuCopenhagen, yakapa matani 16 ezvinhu zvekushandisa (Personal Protective Equipment kana kuti PPE) kuvashandi vezveutano izvo zvakananga kubatsira kurwisa kupararira kweCovid-19 muZimbabwe. Zvinhu izvi zvinosanganisira mamasiki nemagawoni,” inodaro UNICEF.
Sangano iri rinoenderera mberi richiti, “Tichishanda pamwe chete nebazi rezveutano nekurerwa kwevana, zvinhu izvi zvakaendeswa kumatunhu ose kuti zvinoshandiswa nevashandi vezveutano.”
UNICEF inoti vashandi vezveutano vemunharaunda, avo vanozivikanwa nekunzi maVillage Health Workers (VHW), vanogamuchira nemawoko maviri chirongwa chekurwisa kupararira kweCovid-19 uye vari kuita basa guru.
“Kubvira pakutanga kwegore rino, vashandi vezveutano vemunharaunda vanosvika 714 vadzidziswa pamusoro penzira dzakanaka dzekudzivirira kuparaira kwechirwere ichi munyika yose. Vashandi ava vari kuwana dzidziso, mayunifomu nezvimwe zvinodiwa mubasa ravo,” inodaro UNICEF.
Sangano iri rinoti vashandi ava vari kuwana dzidziso iyi kuburikidza nebazi rezveutano nekurerwa kwevana richitsigirwa nemapoka anosanganisira World Bank (Zimbabwe Cyclone Idai Recovery Programme) neHealth Development Fund (HDF).
Kunze kwekubatsira mukurwisa kupararira kweCovid-19, vashandi vezveutano vemunharaunda vanobatsira zvakare nezvimwe zvakasiyana zvinosanganisira kuona kuti vana vawaniswa chikafu chinovaka muviri uye kuti nharaunda dzagara dzakatsvinda.