‘. . . zvava kuda minamato’
MUIMBI wenziyo dzechitendero — Patrick Scale — anoti vemakereke pamwe nevaimbi vanofanirwa kubatana mukuisa minamato yakasimba nekuparidzira kunyika yose kuti veruzhinji vagare vakachengetedzeka zvichitevera kupararira kuri kuita chirwere cheCovid-19.
Scale, uyo anotungamira chikwata cheLast Seen, anoti Covid-19 yauya iine huturu hwakanyanya nekudaro zvakakosha kuti veruzhinji vaende kunobaiwa majekiseni ekudzivirira kupararira kwechirwere ichi.
“Nguva yatasvika iye zvino hama dzangu tave kufanirwa kungotungamidza Mwari Musiki nekuti Covid-19 yativhiringidza zvakanyanyisa raramiro yedu.
“Hatina kumbofungira kuti upenyu hwedu huchashanduka kudai. Ngatibatanei vemakereke nesu vaimbi mukunamatira nyika yedu uye toramba tichikurudzira veruzhinji kutevedzera matanho ose akaiswa neHurumende pamwe neWorld Health Organisation (WHO) ekurwisa denda iri.
“Matanho aya anosanganisira kuti vanhu vasaungane, vagare vakapfeka mamasiki, kugeza maoko nemvura ine sipo kana kushandisa sanitiser nguva dzose kuti denda iri risarambe richipararira pamwe nekuuraya vanhu,” anodaro.
Scale, uyo ari kunetsa nekambo kanonzi ‘Shamwari Yakanaka’, anoti semuimbi, denda iri rakakanganisa
zvikuru basa rake izvo zvakazomutuma kuti achangamuke ndokutanga kuita mamwe mabhindauko ayo ari kumuraramisa panguva ino.
“Sevaimbi, basa redu raenda mudondo chaizvo nekuti isu tairarama zvikuru nemashoo uye aitibatsira kusangana nevatsigiri vedu avo vaitenga mimhanzi yedu izvo zvaitiraramisa asi zvose zvakaenda mudondo.
“Zvave kuda kushinga uye kutanga kuzvishandira nemaoko kuti tiite mari sevaimbi panguva ino zvinhu zvakaoma kudai,” anodaro Scale.