Vechidiki vorwisa mhirizhonga
SANGANO rinoshanda nevechidiki reFor Youths by Youths rakatanga chirongwa chekufamba munharaunda dzakasiyana vachipa chenjedzo yekuipa kwemhirizhonga yemudzimba uye kukurudzira mhuri kuti dzigarisane murunyararo.
Nguva pfupi yadarika For Youths by Youths yakapa dzidziso pamusoro pekuipa kwemhizhonga yemudzimba kuMufakose, muguta reHarare.
Mutungamiri wesangano iri, VaWilbert Jena, vanoti vechidiki vazhinji upenyu hwavo huri kukanganiswa nekuda kwemhizhonga sezvo vachigara vachiona vabereki vavo vachirwisana zvinova zvimwe zvezvikonzero zvinoita kuti vatange kutora zvinodhaka.
“Isu sevechidiki, tiri kuita chikamu chikuru mukushambadza huipi hwemhirizhonga nekuti takaona kuti haina kumbonaka zvachose.
“Nyaya dzemhirizhonga dzakazonyanya kuwedzera panguva yeCovid-19 lockdown. Nekuda kwemhirizhonga iyi, ndizvo zvimwe zvinozotuma vechidiki kuti vatange kutora zvinodhaka nekuti kumba kunenge kusiri kugarika.
“Saka takatora danho rekurwisa mhirizhonga kuburikidza nekufamba munharaunda dzakasiyana tichiita hurukuro neveruzhinji tichivakurudzira kuti vagare zvakanaka mudzimba.
“Mhirizhonga haina kumbonaka, inokanganisa vana kunyanya uye ivo vabereki vacho vamwe vanosvika pakufa nekuda kwemhirizhonga iyi. Saka ngatigarisane murunyararo,” vanodaro VaJena.
Vanoenderera mberi vachiti, “Ngatigare tichipa chenjedzo kune veruzhinji kuti ngatisiyanei mhirizhonga.”
Vanoti kutora zvinodhaka kuri kuitwa nevamwe vechidiki kunokanganisa utano neremangwana ravo.
“Zvinodhaka zvinokuvadza muviri, ndizvo zvimwe zvinokonzeresa kuti kana munhu adhakwa otanga kuita mhirizhonga. Saka tiri kupa chenjedzo nekukurudzira veruzhinji kuti vasiyane nekutora zvinodhaka,” vanodaro VaJena.