Do kryenin sulm terrorist me bombë për ISIS, arrestohet çifti i shqiptarëve
Mediat italiane publikuan dje momente të operacionit të ndalimit të dy të rinjve nga Kosova, por të lindur në Itali. Ishin rekrutuar nëpërmjet internetit dhe bënin radikalizëm po në këtë rrjet, teksa ishin instruktuar në Trento për sulm terrorist. Pas goditjes do arratiseshin në Afrikë dhe bashkoheshin me Shtetin Islamik. Gjykata jep masa me arrest shtëpiak, për t’i deradikalizuar
Një çift shqiptarësh me origjinë nga Kosova, por të lindur në Itali, janë arrestuar nga karabinierët në një operacion të befasishëm antiterrori, pasi akuzohen se planifikuan një sulm terrorist në emër të organizatës ISIS. Familja me origjinë kosovare, prej kohësh kishin hyrë në rrugën e radikalizimit, përmes propagandës xhihadiste në internet dhe ishin trajnuar për të kryer sulme terroriste. Sipas mediave italiane, ato kishin planifikuar një sulm me mjete shpërthyese në Itali, në emër të organizatës terroriste ISIS, pavarësisht se e kanë mohuar gjatë marrjes paraprake në pyetje.
Të dyshuarit janë vënë nën hetim nga drejtësia italiane për bashkëpunim me qëllim terrorizmi, ose përmbysje të rendit demokratik, rekrutim dhe trajnim për qëllime terroriste, duke përfshirë edhe ato ndërkombëtare.
Burri dhe gruaja, emrat e të cilëve nuk u publikuan për momentin, u ndaluan më 15 qershor, pas urdhërit të lëshuar nga Prokuroria e Trentos, ndërsa gjykata vendosi më 18 qershor masën e sigurisë ‘arrest shtëpie’ dhe vetëm dje lajmi është publikuar në media. Për burrin u vendos detyrim edhe mbajtja e byzylykut elektronik.
Vendimi për masën e sigurisë, sipas karabinierëve, është përcaktuar nga nevoja që autoritetet e drejtësisë italiane, të garantojnë deredikalizimin e dy të dyshuarve dhe familjes së tij. Sipas hetuesve, dy të dyshuarit pasi të kryenin sulmin në Itali, do të arratiseshin drejt Afrikës, për t›iu bashkuar organizatës terroriste “Shteti Islamik”.
Gjatë operacionit u sekuestruan pajisje kompjuterike dhe produkte kimike, lëndë për prodhimin e mjeteve shpërthyese, të cilët u çuan për hetime. Janë publikuar pamjet e operacionit të policisë italiane, teksa janë vënë në pranga çifti shqiptar nga Kosova, të cilët dyshohet se do të kryenin një sulm terrorist në Itali. Burri dhe gruaja, dyshohet se ishin trajnuar nga xhihadistët për të kryer sulmin përmes shpërthimit në emër të organizatës terroriste “Shteti Islamik” (ISIS).