Spanja sjell dosjen, i hapet rrugë ekstradimit të ish-drejtorit Prodani, vodhi dhe vilën e Benzema

Më 7 maj të këtij viti, Interpol Tirana ekzekutoi urdhrin e kërkimit të vitit 2013 të Gjykatës së Korunjës, që e akuzonte ish-drejtorin e Ujësjellës-Kanalizimeve Kurbin, si pjesë e një grupi grabitësish të personazheve VIP, në Madrid dhe Barcelonë. Gjykata kthen masën në “arrest me burg” pas kalimit të afatit 40 ditor, do dërgohet drejt Spanjës

Spanja sjell dosjen me letër-porosi, i hapet rruga ekstradimit të ish-zyrtarit të lartë vendor, i akuzuar për një serial grabitjesh, përfshi edhe persona VIP, si rasti i sulmuesit të Real Madrid, francezit Karim Benzema. Ish-drejtori i Ujësjellës-Kanalizime në Kurbin, Alfred Prodani, i arrestuar në fillim të muajit maj, bëhet me dije se do të ekstradohet drejt këtij shteti për t’u përballur me drejtësinë. Pas përfundimit të afatit të paraburgimi 40-ditor, Gjykata e Kurbinit ndryshoi dhe masën e sigurisë për 41-vjeçarin, duke e lënë në burg pa afat, ndërsa vijojnë procedurat për ekstradimin drejt shtetit spanjoll.

Menjëherë pas arrestimit, autoritetet iberike sollën dosjen hetimore dhe provat që e implikojnë Prodanin në disa episode vjedhjes, duke detyruar togat e zeza në Kurbin që ta mbajnë në burg ish-zyrtarin me qëllim ekstradimi.

Ish-drejtori i Ujësjellës-Kanalizime në Kurbin u arrestua nga policia më 7 maj, pasi ishte shpallur në kërkim ndërkombëtar prej disa vitesh, për vjedhje në zonat e Madridit apo Barcelonës. Operacioni policor i koduar “Coruna” u finalizua nga forcat policore të Komisariatit të Policisë Kurbin, në bashkëpunim me INTERPOL Tirana.

41-vjeçari banues në Kurbin, u prangos pa bërë rezistencë në qytetin e Laçit, ndërsa ndalimi i tij u bë me qëllim ekstradimi. Ai ishte shpallur në kërkim, pasi Gjykata Coruna/Spanjë, në vitin 2013, ka lëshuar urdhër-arresti ndërkombëtar, për veprën penale “vjedhja me dhunë”, parashikuar nga Kodi

Penal i Spanjës. Prej 9-vitesh Alfred Prodani mbante postin e Drejtorit të Ujësjellës-Kanalizime në Kurbin, si përfaqësues i Partisë Socialiste. Ai e kishte mohuar disa herë akuzën se ishte i kërkuar ndërkombëtar apo i dënuar në Spanjë, pas denoncimeve publike nga opozita. Por së fundmi Spanja ka përcjellë edhe në mënyrë zyrtare dosjen penale, teksa Gjykata aprovoi ndalimin me qëllime ekstradimi. Në dosje gjendet edhe rasti i grabitjes së vilës së sulmuesit francez Benzema, si dhe të disa sipërmarrësve spanjollë apo njerëzve të njohur.