I bën Vetting magjistratëve për pasuritë, SPAK çon në gjyq po për pasurinë anëtaren e KPK-së

Mbyllen hetimet për gjyqtaren Etleda Çiftja, me akuzat për fshehje pasurie dhe falsifikim. Dyshohet se ka mashtruar me deklaratën e pasurisë në ILDKPKI për apartamentin, dy toka arë dhe një kredi. E diplomuar që nga 1999 si juriste me titullin “Avokat”, prej vitit 2017 ishte zgjedhur në KPK. Edhe dje ishte në detyrë, GJKKO s’ka marrë masë pezullimi ndaj saj. E treta anëtare e Vettingut nën akuzë, pas të dyshuarit Hajdari dhe të dënuarit Daci

Një tjetër anëtare e Komisionit të Pavarur të Kualifikimit të Vettingut për magjistratët, ndodhet nën akuzë si e pandehur nga SPAK për shkelje të ligjit, teksa pavarësisht dosjes, ajo ka vijuar detyrën edhe ditën e djeshme. Sipas hetimeve të deritanishme, ironia qëndron në faktin se Etleda Çiftja akuzohet për fshehje të pasurisë, pikërisht një nga kriteret kryesore të shkarkimit nga detyra të dhjetëra gjyqtarëve dhe prokurorëve gjatë katër viteve të fundit. Më herët kishte qenë anëtari Luan Daci që u shkarkua dhe dënua me shërbim prove, teksa i rezistoi për dy vite largimit nga zyra sipas parashikimeve të ligjit. Kurse Çiftja, ndryshe nga Daci, vijon të jetë në detyrë, pasi GJKKO nuk ka dhënë ende masë pezullimi ndaj saj. Prokuroria e Posaçme njoftoi dje se mbylli hetimet dhe dërgoi për gjykim anëtaren e Komisionit të Pavarur të Kualifikimit (KPK) Etleda Çiftja, e akuzuar për fshehje pasurie dhe falsifikim.

Sipas njoftimit të SPAK, gjyqtarja ka kryer deklarim të rremë të pasurisë, duke mashtruar në lidhje me burimin e blerjes së apartamentit të banimit, të dy parcelave tokë arë, me mënyrën e fitimit të pronësisë për dy sipërfaqet e tokave arë, si dhe në lidhje me qëllimin e marrjes së një kredie pranë një banke. Gjithashtu, vijon më tej njoftimi, “Çiftja ka dorëzuar pranë Inspektoratit të

Lartë të Deklarimit dhe Kontrollit të Pasurive dhe Konfliktit të Interesit (ILDKPKI), një kontratë me përmbajtje të falsifikuar”. Dokumenti i dorëzuar rezulton se nuk përputhet me atë të gjendur pranë arkivës së zyrës noteriale, ku është përpiluar dhe pranë ASHKsë në momentin e regjistrimit të pasurisë, për të cilën është lidhur kjo kontratë. “Gjithashtu kjo kontratë përmban të dhëna të rreme edhe në lidhje me vetë veprimin e pasqyruar në të, pra shitje-blerjen e parcelës tokë arë”, përfundon SPAK. Çiftja është anëtarja e tretë e institucioneve të Vetting-ut që procedohet penalisht dhe merret e pandehur nga SPAK.

Më parë janë proceduar anëtarët e Kolegjit të Posaçëm të Apelimit, KPA, Ardian Hajdari dhe Luan Daci, ku i pari nuk është shpallur fajtor dhe i dyti po. Në faqen online të KPKsë shkruhet se Çiftja është diplomuar si juriste në vitin 1999 në Fakultetin e Drejtësisë, Universiteti i Tiranës. Ajo ka punuar më shumë se 16 vite si juriste, kryesisht në sektorin e ndërtimit, pronave, kuadrit rregullator për lejet dhe licencat në fusha të ndryshme të ligjit. Gjithashtu, Çiftja mban titullin “Avokat” që nga viti 2001 dhe u zgjodh në qershor 2017 nga Kuvendi i Republikës së Shqipërisë, në postin e Komisioneres pranë Komisionit të Pavarur të Kualifikimit.