Hakerat iranianë i ‘qepen’ politikës, publikojnë listat e zgjedhësve
Rjedhje e re informacionesh në rrjetin “Telegram” të grupit agresiv kibernetik, që ka vënë në shënjestër Shqipërinë prej më shumë se një viti. Publikojnë një ngarkesë informacioni me emra, me kapacitet 741.8 MB. Mesazhi: “Ende mendojmë politikanët e korruptuar, që nuk kemi të dhëna sensitive?!”
Hakerat iranianë publikojnë ‘serinë’ e radhës të materialeve të vjedhura nga serverat e qeverisë shqiptare. Grupi “Homeland Justice”, nëpërmjet platformës së tyre mediatike “Telegram” kanë ‘goditur’ sërish dhe këtë herë listën e zgjedhësve, duke kaluar në fushën politike, pas informacioneve që cenonin rendin, sigurinë dhe sekretet e institucioneve dhe drejtuesve të tyre, si SHISH, Qeveria, Ministria e Brendshme, Policia e Shtetit dhe të tjera. Bëhet fjalë për një databazë me kapacitet prej 741.8 MB, që përmban mijëra emra qytetarësh.
Në të shkruhen të dhënat gjenerale si emri, mbiemri e datëlindja e vendlindja e qytetarëve.
Në disa prej tyre shkruhet se janë pjesë e votuesve në vitin 2015, ndërsa në shumë të tjerë nuk përcaktohet.
“Mendojnë ende politikanët tanë të korruptuar, që ne nuk kemi akses tek të dhënat sensitive?!”, shkruajnë krah listës. Lista e zgjedhësve publikohet pas patentave të shqiptarëve.
Më herët, hakerat kanë publikuar të dhënat kreut të SHISH, Helidon Bendo, të dhënat personale dhe udhëtimet jashtë vendit të kryeministrit, e-mailet e ish-drejtorit të Policisë së Shtetit, Gledis Nano, atij aktual, Muhamet Rrumbullaku, nëndrejtorit të SHISH, të dhënat personale të qytetarëve, numrat e telefonit, targat dhe llojet e automjeteve
SPANJË që posedojnë, dokumente dhe e-maile të administratës publike, etj.
Më 10 shtator, Shqipëria u përball me sulmin e dytë kibernetik, kësaj herë ishte sistemi TIMS, pas sulmit të shërbimeve online qeveritare dhe e-Albania. Për dy ditë oficerëve iu desh të bënin përpunime si para tre dekadash, me regjistra. Më herët ishte goditur edhe AKSHI, nëpërmjet “administrata. al”, si dhe e-Albania. Objekt sulmi në publikim informacionesh ka qenë edhe kryeministri Edi Rama, sidomos ato që kishin të bënin me fluturimet e kreut të qeverisë dhe shpenzimet në zërat operativë të institucionit.
Për këto sulme janë në kërkim celula me 5 hakera iranianë, të drejtuar nga një profesor i elektronikës në Teheran, si dhe nën akuzë 5 punonjës IT të administratës shqiptare, që nuk parandaluan apo pikasën viruset e hedhura nga hakerat për 14 muaj me radhë, apo të përforconin sistemin e serverave me VPN apo antiviruse bashkëkohore, që të mos thyhej muri i sigurisë.