Ndjekja e klandestinëve përfundon me plagosjen e egjiptianit nga polici
Blutë u vunë në ndjekje të një furgoni me 13 emigrantë të paligjshëm nga vendet MENA. Grupi s’iu përgjigj thirrjes dhe në ndjekje nëpër shkurre, arma e efektivit K.B., bëri shkrepje të pavullnetshme. Emigranti mori plumb në brinjë, dërgohet te Trauma. Prokuroria dhe AMP nisin hetimet, polici kufitar i Kukësit pezullohet nga detyra dhe vihet nën akuzë për plagosje nga pakujdesia. Arrestohet i dyshuari si trafikant, 2 fierakë në kërkim
Një klandestin egjiptian është plagosur nga një efektiv policie në detyrë, në rrethana që zyrtarët thanë se ishin aksidentale, gjatë një operacioni kundër emigrantëve të paligjshëm dje, në kufirin në Morinë. Sipas prokurorisë vendore, është arrestuar në lidhje me aksionin edhe K.Gj., i dyshuar për “dhënie ndihme për kalim të paligjshëm, e kryer në bashkëpunim”, si dhe “kundërshtim të punonjësve të policisë”, ndërsa janë shpallur në kërkim dy të tjerë. Ndërkohë ka mbetur i plagosur shtetasi me inicialet M.H., me kombësi egjiptiane, (i ardhur klandestin në vendin tonë). Prokuroria bëri me dije se ka urdhëruar fillimin e procedimit penal në ngarkim të punonjësit të policisë së DVP Kukës, me inicialet K. B., i cili ka qenë pjesë e operacionit policor, për veprën “plagosje e rëndë nga pakujdesia”. Kurse Agjencia për Mbikëqyrjen Policore konfirmoi mbrëmë se edhe ajo ka referuar materialet për hetim, si dhe pezullimin nga detyra të efektivit, deri në sqarimin e rrethanave dhe mbylljen e hetimeve. Por paraprakisht sqarohet se polici nuk ka qëlluar me vullnet të plotë ndaj klandestinit në zonën kufitare, por në ndjekje e sipër, teksa kalonte nëpër shkurre, arma pistoletë e shërbimit ka kapur këmbëzën në degë dhe bëri shkrepjen e pavullnetshme. Gjithsesi prokuroria vlerëson se hetimo do bëhet i thelluar, duke pritur edhe plotësimin e dosjes me dëshmi të tjera, si dhe rrëfimin e vetë të plagosurit, që po trajtohet në spital.
Ngjarja mori fill teksa blutë pikasën afër Morinës një furgon me klandestinë, që po tentonte të kalonte ilegalisht kufirin. Pasi u ka bërë shenjë për të ndaluar, shtetasit klandestinë nuk i janë bindur urdhrit për të ndaluar. Më pas ata kanë zbritur nga furgoni dhe ndjekja nga policia është bërë në këmbë, nga ku edhe është qëlluar.
I riu egjiptian sipas mjekëve, ka mbetur i plagosur në pjesën e brinjëve dhe është transportuar me urgjencë në Spitalin e Traumës, ku po mbahet jashtë rrezikut për jetën. Janë ndaluar dhe po merren në pyetje shtetasit e tjerë klandestinë, ndërsa paraprakisht dyshohet se ngjarja ka ndodhur nga pakujdesia. “Prokuroria, në bashkëpunim me Agjencinë e Mbikëqyrjes Policore, po hetojnë nëse ka pasur shkelje nga ana e efektivëve të Kukësit në lidhje me rastin”, thuhet në njoftimin zyrtar.
Prokuroria konfirmoi se emigranti i paligjshëm është plagosur gjatë operacionit për neutralizimin e autorëve të sipërpërmendur dhe se “ka urdhëruar fillimin e procedimit penal në ngarkim të punonjësit të policisë së DVP Kukës K. B., i cili ka qenë pjesë e operacionit policor, për veprën “plagosje e rëndë nga pakujdesia”.
Gjithashtu u shpallën në kërkim shtetasit E.M., lindur në Fier, dhe E.H., lindur në Fier. “Këta shtetas në bashkëpunim me njëri-tjetrin po transportonin drejt Kosovës 13 shtetas të huaj nga vendet e treta MENA. Me cilësinë e provës materiale, u sekuestrua një automjet furgon i marrë me qira”, sqaktësohet në njoftim.
Gjithashtu sqarohet se ky operacion në kufi ka qenë i planifikuar nga Drejtoritë e Policive Kukës dhe Dibër, në mënyrë të përbashkët, pasi kanë zbuluar disa rrugë trafikimi që ndiqnin të dyshuarit.
Një 25-vjeçar nga Tropoja është arrestuar nga policia vendore ditën e djeshme, pasi ndaj tij ka pasur denoncim për abuzim seksual ndaj të miturve. Burime zyrtare thanë se i dyshuari është E.B., i kallëzuar nga një 16-vjeçare, se se ka abuzuar seksualisht me të. Efektivët kanë arrestuar të riun me banim në Durrës, ndërsa Prokuroria e Tropojës ka nisur hetimin për zbardhjen e plotë të këtij rasti. I dyshuari e ka mohuar akuzën e ngritur, teksa do dalë në gjykatë për masën e sigurisë. “Specialistët për Hetimin e Krimeve arrestuan shtetasin E. B., 25 vjeç, banues në Shënavlash, pasi ka kallëzuar një shtetase e mitur 16 vjeçe, se 25-vjeçari ka kryer marrëdhënie seksuale me të, pa dëshirën e saj. Vijon puna, nën drejtimin e Prokurorisë Tropojë, për verifikimin e plotë të këtij kallëzimi”, thuhet në njoftimin e policisë.