Brazili i pandalshëm, poker Koresë së Jugut dhe çerekfinalja e tetë radhazi
Latinët, pesë herë kampionë të trofeut të artë, janë argëtuar mbrëmë duke shënuar katër gola që në pjesën e parë dhe kërcyer në grup çdo rrjetë me samba, bashkë me teknikun Tite. Koreanët shënuan golin e nderit me një goditje nga larg. Nejmar u rikthye nga dëmtimi. Për në gjysmëfinale, duhet të kalojnë Kroacinë
Jo më kot janë superkampionët, me 5 botërorë të fituar. Humbja me Kamerunin duket se ishte një “shashkë”, teksa rikthimi i Neymar nga dëmtimi në kohë rekord, ktheu edhe ‘sambën’ dhe alegrinë tek latinët. Brazili kaloi mbrëmë në fazën çerekfinale të Kupës së Botës, Katar 2022, pas fitores në dukje shumë të thjeshtë, 4-1, ndaj Koresë së Jugut. Kjo është çerekfinalja e tetë radhazi e skuadrës që drejtohet nga Tite, ndërsa do tentojnë të fitojnë për herë të gjashtë kupën e artë dhe aq të lakmuar. Teksa përballë do të ketë tashmë Kroacinë, për të kaluar drejt gjysmëfinales.
Ekipi i trajnerit Tite dominoi të gjithë fraksionin e parë, duke gjetur rrugën drejt rrjetës që në minutën e 7’, me Vinicius Junior. Në minutën e 13’ Neymar realizoi nga pika e bardhë, pas Richarlison fitoi penallti, ndërsa në minutën e 29’ rrugën drejt rrjetës e gjeti ky i fundit.
Në minutën e 36’ Paqueta shënoi pas një asisti të dhuruar nga Vinicius Junior dhe vulosi rezultatin e pjesës së parë. Brazili shpërdoroi pa fund raste të tjera, duke u treguar të pasaktë.
Në fraksionin e dytë u duk sikur Brazili “ndryshoi fytyrë”, pasi koreano-jugorët filluan të sulmonin gjithmonë e më shumë në portën e Alisson, me Paik Seung-Ho që gjeti rrugën drejt rrjetës në minutën e 76. Minutat e mbetura patën më shumë ndërrime lojtarësh, sesa lojë dhe rezultati mbeti i pandryshuar.
Kështu Brazili preu biletën për në çerekfinale për herë të tetë radhazi, dhe këtë herë përballë do të ketë Kroacinë, me të cilën do të “diskutojnë” vendin e gjysmëfinales. Humbja me Kamerunin e zbehu pak ‘aureolën’ e latinëve, që vinin nga 17 ndeshje radhazi pa humbje, por mbrëmë duket se e rigjetën veten dhe spektaklin, ku çdo gol u festua me kërcim në grup, duke përfshirë edhe teknikun Tite pas golit të dytë.