Ryshfet për afrim gjyqi, gruaja në gjyq

Dërgohet për gjykim dosja për Suzana Mandijën, akuza për korrupsion pasiv. Akuzë edhe Gëzim Shalës Prokuroria: U dhanë para tek kancelarja e gjykatës së Durrësit

Hetimi për Suzana Mandijën, e cila dyshohet për veprën penale të "Korrupsionit pasiv të funksionarëve të drejtësisë", ka përfunduar. Mandija akuzohet se i ka marrë një shumë parash një shtetasi, me qëllim që të afronte datën e procesit gjyqësor civil që kishte qytetari në Gjykatën e Apelit Durrës. Prokuroria për Krime të Rënda gjithashtu ka dërguar për gjykim edhe Gëzim Shalën, i akuzuar për "Ushtrim ndikimi të paligjshëm". Sipas organit të akuzës, ky shtetas ka ndërhyrë tek e pandehura Mandija për të ' ndihmuar' qytetarin që kërkonte shqyrtimin e çështjes së tij në një kohë sa më të shpejtë.

HETIMET

Në vitin 2015, Drejtoria e Përgjithshme e Policisë ka referuar pranë Prokurorisë për Krime të Rënda kallëzimin e shtetasit S. T. Kallëzuesi tregon se ka pasur një problem për pronën e tij e cila është në emër të vëllait të tij. Kallëzuesi ka përfaqësuar vëllain e tij në proceset gjyqësore. Për këtë qëllim ka hapur proces gjyqësor në Gjykatën e Shkallës së Parë, Elbasan. Gjykata e pranoi kërkesën dhe vendosi detyrimin e ZVRPP Gramsh për të bërë regjistrimin e parcelës, sipas aktit të marrjes së tokës në pronësi. ZVRPP e ka apeluar këtë vendim në Gjykatën e Apelit Durrës. Për rreth një vit nuk ka pasur asnjë njoftim për caktimin e datës për zhvillimin e seancës gjyqësore. Është interesuar pranë Gjykatës së Apelit, te sporteli i kancelares, dhe meqenëse sporteli ishte i mbyllur, është ulur në kafenenë e cila ndodhet brenda ambienteve të kësaj gjykate. Aty brenda gjeti një grua rreth 35- 40 vjeçe, me gjatësi rreth 1.65 cm, me flokë të zinj të prerë shkurt. Ajo e pyeti si me nxitim që si e ka problemin dhe S. T. i ka thënë që ka një çështje civile por ka kaluar shumë kohë dhe akoma nuk ka njoftim se kur do të zhvillohet. Ajo mori numrin e Vendimit të Gjykatës së Shkallës së Parë të Elbasanit dhe shkoi në zyrën e saj. Pas rreth një ore ajo i thotë se do ta ndihmojë për caktimin e datës që të jetë sa më afër por nuk merr dot gjë përsipër për gjyqtarët, duke e lënë të kuptonte që për gjyqtarët duhej të flisnin përsëri. Pas rreth 2- 3 muajsh u caktua data për zhvillimin e seancës gjyqësore. Kur ishte data e gjyqit, shkon përsëri në Gjykatën e Apelit dhe ulet në lokalin që ndodhej brenda ambienteve të gjykatës, dhe prapë po ai kamerier e njofton Zanën se donte ta takonte. Zana vjen dhe ulet në tavolinën e tij, ku S. T. e falënderon që i caktoi një datë për gjyqin. Trupi gjykues e rrëzoi vendimin e Gjykatës së Shkallës së Parë të Elbasanit ku ai ishte fitues dhe vendosi që kjo çështje të kthehej dhe një herë për gjykim në shkallën e parë por të gjykohej nga një gjyqtar tjetër, me pretendimin se Gjykata e Shkallës së Parë e Elbasanit nuk e ka gjykuar drejt çështjen. Çështja u kthye përsëri për gjykim në Elbasan. Kjo çështje zgjati edhe dy vjet të tjera, derisa Gjykata e Shkallës së Parë të Elbasanit të jepte një vendim. Gjykata e Shkallës së Parë i dha përsëri të drejtë paditësit S. T. dhe vendosi detyrimin e ZVRPP- së që të bënte regjistrimin e parcelës, si dhe plotësoi të gjitha detyrat e lëna nga Gjykata e Apelit Durrës. Ky vendim është apeluar përsëri në Gjykatën e Apelit të Durrësit nga ana e një personi tjetër si palë e paditur. Pasi kishin kaluar rreth 7- 8 muaj, akoma nuk i ishte caktuar një datë për zhvillimin e gjyqit. Kallëzuesi ka shkuar në Durrës te Gjykata e Apelit për t'u interesuar për datën e gjyqit. Te sporteli ishte një gocë tjetër, së cilës i shpjegoi pse kishte ardhur. Ajo gjithashtu i sugjeroi që të takohej me kancelaren për të caktuar një datë sa më të shpejtë për zhvillimin e gjyqit. E pyet se kush ishte kancelarja dhe i thotë se quhej Zana dhe se është ajo që ka qenë më përpara. Në lidhje me sa është parashtruar në kallëzim, shtetasi S. T. ka pranuar me anë të marrëveshjes së nënshkruar me oficerin e policisë gjyqësore për të aplikuar përdorimin e metodave speciale të hetimit. Në vijim të hetimit rezultoi se e pandehura, gjatë ushtrimit të detyrës funksionale që ka, përkundrejt shpërblimit të padrejtë në para ka ndërhyrë në procesin administrativ të shortit të çështjeve, duke favorizuar kallëzuesin S. T. Ndërsa i pandehuri Gëzim Shala me veprimet e tij i ka kërkuar kallëzuesit S. T. një përfitim të paligjshëm, duke i premtuar ndërhyrjen te kancelarja e Gjykatës së Apelit Durrës, me qëllim për të ndihmuar kallëzuesin në procedurën e shortit të çështjes civile.