Ekonomia, e fituara e madhe

me kthimin gradual të besimit në drejtësinë tonë, e përbën edhe rritja e investimeve të kapitalit privat shqiptar. Prokurorët dhe gjyqtarët e korruptuar e të paaftë të drejtësisë sonë kanë qenë gjithnjë në këto dy dekadat e fundit, në rastin më të mirë një shpurë e pasigurt për të vënë në vend të drejtat e shkelura për pronësinë apo ushtrimin e aktivitetit të biznesit, dhe në rastin më të keq dhe të shpeshtë, një trupë gjobëvënësish për biznesin vendas. Një çlirim i shpresuar dhe i shumëpritur prej presioneve dhe shantazheve të kësaj trupe do të përkthehet në dhjetëra miliona euro më shumë investime të sipërmarrësve shqiptarë që ende ngurrojnë vetëm nga presioni i drejtësisë së korruptuar. Me gjyqtarë e prokurorë, ku jo vetëm përzgjedhja e tyre, por edhe veprimtaria e përditshme do t'u shikohet me lupë nga ekspertë perëndimorë, ulet shumë mundësia nga politika e ditës që të prodhojë shantazhe dhe provokime të rënda ndaj kundërshtarit politik, duke përdorur Prokurorinë apo gjykatat. Në fund të fundit, i gjithë shtensionimi politik dhe shtimi i sigurisë së investimit privat do të shohë rritjen e pashmangshme ekonomike në nivele që do të ndihmojnë ndjeshëm punësimin. Parashikimet më të ngurta për vitin 2017, edhe pse një vit zgjedhor dhe me luftë të ashpër politike, japin një rritje me 1- 2 për qind të Prodhimit të Brendshëm Bruto të vendit më shumë sesa po të mos ishte miratuar reforma në drejtësi, ose në nivele 100- 140 milionë euro më shumë dhe një rritje të plotë prej 5 për qind të GDP- së! Përfitimi i tretë dhe ndoshta më i madhi për ekonominë tonë është rritja e gjasave për një integrim të shpejtë në familjen e madhe evropiane, në Bashkimin Evropian. Përmirësimi i imazhit të vendit përpara partnerëve kryesorë ndërkombëtarë të Shqipërisë do të sjellë me siguri absolute përshpejtimin e negociatave për anëtarësim të plotë në BE, pavarësisht votimit ' Jo' ( Brexit) të Britanisë së Madhe dhe mundësisë që ajo të dalë nga BE- ja. Të gjitha këto arsye prodhojnë optimizëm në veprimtarët ekonomikë të vendit dhe një sezon turistik që po shpaloset shumë premtues, mund të sjellin vetëm për këtë vit rritjen ekonomike jo vetëm 3.4 për qind sa parashikimi i qeverisë, por ndoshta edhe 4 për qind. 21 korriku është me të vërtetë një datë e shënuar për ekonominë e vendit, pavarësisht se sot janë të paktë ata që e kuptojnë të plotë rëndësinë për mirëqenien ekonomike të secilit prej nesh.