Vritet në Vlorë Ilir Deromemaj dhe Dhimitër Cami, plagoset një tjetër

Izolohen portat e Vlorës, shoqërohen të parët në komisariat

VLORE-

Breshëria e armëve dhe lajmi për dy të vdekur e një të plagosur nga atentati kanë tronditur Vlorën natën e së dielës. Ngjarja ka ndodhur në një qendër bastesh në lagjen “Partizani” te spitali. Nga të dhënat paraprake, një person ende i paidentifikuar ka hapur zjarr me kallashnikov në drejtim të qendrës së basteve, ku nga të shtënat humbi jetën shtetasi Ilir Deromemaj si dhe Dhimitër Cani, rreth 60 vjeç si dhe u plagos Krenar Runaj, 53 vjeç. Mësohet se i plagosuri ndodhet në gjendje të rëndë për jetën, ndërsa u transportua me urgjencë në spital, ku po i nënshtrohet një operacioni. Sipas burimeve paraprake, Ilir Deromemaj është person me precedent penal, pasi në vitin 1998 ka vrarë shtetasin Lame Gockaj, ndaj mendohet se objektivi i atentatit të ketë qenë Deromemaj. Mbiemri Deromemaj është i njohur njëkohësisht në Vlorë, pasi në zgjedhjet lokale të vitit 2015 Partia Demokratike vuri përballë mjekut Dritan Leli ndërtuesin Genc Deromemaj, i cili ka lidhje gjaku me viktimën. Forca të shumta policore që kanë mbërritur në vendngjarje kanë nisur hetimet për identifikimin dhe kapjen e autorit. Bëhet me dije se janë sho- qëruar tre të parët në komisariat, ndërsa portat hyrëse në qytetin bregdetar u izoluan nga patrullat, të cilat kontrollojnë çdo lëvizje. Nga pistat hetimore të deritanishme dyshohet se krimi mund të ketë ndodhur për hasmëri, ndërsa pritet të zbardhet dinamika e ngjarjes. Sipas informacioneve që përcjell gazetari i “News 24”, Enrik Mehmeti, dyshohet që autori i ngjarjes pasi ka zbritur nga një automjet, ka hapur zjarr në drejtim të pikës së basteve. Burime policore dyshojnë se objektiv i sulmit ka qenë Ilir Deromemaj.