Masakra në Mynih, atentatori i joshi shqiptarët me ushqim falas
Policia: Autori kishte një vit që po planifikonte sulmin, ishte i fiksuar pas vrasjeve masive Shkon në katër numri i viktimave shqiptare
Ali Sonboly, autori i sulmit në Mynih, ku humbën jetën 9 persona, mes tyre 4 shqiptarë, kishte nisur përgatitjet për ngjarjen që para një viti. Sipas "Tgcom", bazuar në të dhënat hetimore të policisë, mësohet se 18- vjeçari kishte vizituar skenën ku ndodhi një sulm i ngjashëm si ai i së premtes, në një shkollë në Winneden. Ngjarja në fjalë kishte ndodhur në vitin 2009, ku një 17- vjeçar vrau 15 vetë në ish- shkollën e tij. Po sipas hetuesve gjermanë, dyshohet se adoleshenti ishte i fiksuar pas ' vrasjeve masive'. "Pas masakrës nuk fshihet asnjë motiv politik dhe nuk është shtyrë nga askush. Madje sulmuesi nuk i zgjodhi as në mënyrë specifike viktimat e tij", - pohoi prokurori i çështjes, Thomas Steinkraus. Po ashtu, gjatë kontrollit të ushtruar nga policia, në kompjuterin e tij u gjet edhe një foto nga Andres Breivik, i cili gjatë një sulmi me armë vrau 77 person në Norvegji në vitin 2011. Mes viktimave të sulmit mbetën të vrarë edhe katër shqiptarë: Dijamant Zabergja, Armela Segashi, Sabina Sulaj si dhe një 14- vjeçar nga Presheva. Në orët e para të mëngjesit të së shtunës, më 23 korrik, policët kishin trokitur në portë për t'i përcjellë lajmin e kobshëm familjes Zabergja se Dijamanti ishte vrarë. "Jam ende në ëndërr. Ende nuk e besoj se çfarë ka ndodhur. As familja ime nuk e beson ende", - tregoi Naim Zabergja për mediat gjermane. Dijamanti ishte djali i vetëm i tij pas dy vajzave, dhe kishte lindur në Mynih. OEZ ishte një qendër tregtare në veriperëndim të Mynihut, një zonë ku jetojnë shumë emigrantë, tepër e frekuentuar sidomos nga të rinjtë. Edhe Dijamanti pasditen e 22 korrikut kishte shkuar për të konsumuar një pije me shokët e tij. "Ai u vra ndërsa shokët e tij u larguan", - thotë i ati për agjencinë gjermane të lajmeve "DPA". Sulmi në Mynih ka prekur edhe shqiptarët nga Lugina e Preshevës, gjashtë prej të cilëve rezultonin të zhdukur që nga dita e sulmeve në Mynih. Ata janë kryesisht gra e fëmijë. Katër prej tyre janë identifikuar, dy gra me dy fëmijët e tyre nga fshati Geraj të Preshevës, ndërsa një person, nga Bujanovci, me nipin e tij ende nuk janë identifikuar. Pas sulmit ata qëndruan të ngujuar për dy ditë në bodrumet afër "MCdonaldit", për të mos rrezikuar në rast sulmi. Ndërsa një tjetër shqiptare nga Kosova është në mesin e të plagosurve nga masakra e Mynihut. Ajo është 44- vjeçarja Lumnije Azemi. 18- vjeçari që kreu masakrën u gjet i vdekur një kilometër larg nga qendra tregtare "Olympia" ku ndodhën vrasjet, dhe policia tregon se Ali Sonboly u vetëvra me një plumb në kokë. "Mbeten ende të paqarta motivet e sulmit dhe hetimet janë në të gjitha pistat", thotë shefi i policisë së Mynihut, Hubertus Andrae. Policia tha se autori vuante nga depresioni dhe se ishte në trajtim psikiatrik. Gjithashtu, u bë e ditur se 18- vjeçari ishte i armatosur me revolen tip "Glock" 9 mm dhe kishte 300 fishekë. "Përmes një postimi fals në ' Facebook' ai kishte ofruar ushqime falas për ata që shkojnë në atë restorant", sqaron policia gjermane. Mendohet se i riu është frymëzuar nga Anders Brei- vik, i cili para pesë vjetësh, në Norvegji, vrau 77 persona. Në dhomën e tij u gjetën materiale për sulme masive me armë, mes tyre edhe një libër me titull "Pse vrasin fëmijët". Pas sulmit tragjik në Mynih, zyrtarë të lartë në Gjermani kanë paralajmëruar për forcimin e ligjeve të shitjeve të armëve në vend. Zëvendës kancelari Sigmar Gabriel, por edhe ministri i Brendshëm, Thomas de Maiziere thanë se qeveria po planifikon të ashpërsojë legjislacionin për të shmangur tragjedi të tilla. Hetuesit ende nuk kanë zbuluar se si autori i krimit, 18- vjecari gjermano- iranian arriti të siguronte armën edhe pse kishte probleme mendore. Gjermania, edhe pse ka ligjet më të ashpra për armët, sërish renditet e katra në botë për numrin e qytetarëve që kanë armë. Pas sulmit në Mynih, politikanë të lartë në Gjermani kanë ngritur zërin për kontrolle më të ashpra për shitjen e armëve.