Meta: Deri në 11 gusht nuk do të ketë seancë
"Reforma në drejtësi, 7 ligjet do diskutohen në kohën e duhur" "Çdo gjë do rakordohet me konsensus"
Kryetari i Kuvendit, Ilir Meta pati dje një ditë të ngjeshur takimesh me ambasadorët e huaj. Temë e bisedimeve ishte votimi i 7 ligjeve që shoqërojnë reformën në drejtësi. Fillimisht ambasadorja e BE- së, Romana Vlahutin dhe ai i SHBA- ve, Donald Lu zhvilluan takime të ndara me kryetarin e Komisionit të Posaçëm të Reformës në Drejtësi, Fatmir Xhafaj, por dhe me kryetarin e Kuvendit, Ilir Meta, në kryesinë e Kuvendit. Ndërsa po dje, Meta u takua edhe me ambasadoren gjermane Susanne Schütz në hotel "Rogner". Pas këtij takimi, kreu i Kuvendit, Meta deklaroi për gazetarët: "Çdo gjë do të ecë normalisht dhe në respekt të Kushtetutës, institucioneve dhe afateve që kemi me partnerët ndërkombëtarë. Po diskutojmë për të përcaktuar sa më shpejt të jetë e mundur kohën e mbajtjes së seancës së duhur për të miratuar ligjin për vettingun dhe ligjet e tjera të domosdoshme". Ai u pyet nëse do të përfundojë miratimi i ligjeve përpara mbylljes së muajit gusht, meqë është kërkuar kaq shumë edhe nga ndërkombëtarët. "Që të jemi korrektë, jemi në një proces diskutimesh, edhe me z. Xhafaj si Kryetar i Komisionit të Posaçëm për Reformën në Drejtësi, edhe me z. Bylykbashi si Nënkryetar i Komisionit dhe përfaqësues i opozitës, edhe me dy ambasadorët e nderuar, ambasadoren e BE, Vlahutin dhe me ambasadorin e SHBA, Lu. Kemi komunikime të vazhdueshme edhe me kryetarët e grupeve parlamentare. E vetmja gjë që mund t'ju them me siguri është që deri më 11 gusht deputetët mund të jenë të qetë edhe të vazhdojnë me programin e tyre", - deklaroi Meta. "Por besoj që këto dy ditë do të jemi shumë më të qartë që të vazhdojmë rrugën e nisur, t'i respektojmë të gjitha afatet që e ndihmojnë Shqipërinë që të marrë rekomandimin pozitiv nga Komisioni Europian për hapjen e negociatave, dhe njëkohësisht edhe që ndihmojnë partnerët tanë, BE, SHBA, për të filluar an- gazhimin e tyre në mbështetje të fillimit të reformës dhe fillimit të implementimit të saj", - u shpreh kreu i Kuvendit. "E vetmja gjë e sigurt që mund t'ju them është që unë, Xhafaj dhe Bylykbashi do të bëjmë pushime dimërore. Për datat pastaj, pasi të rakordojmë çdo gjë me konsensus, do t'ju njoftojmë në orët e ardhshme, në dy ditët e ardhshme, atëherë kur ne të jemi të bindur që po shkojmë drejt një seance të suksesshme", - u shpreh Meta. I pyetur nëse do të mblidhet Komisioni parlamentar i Ligjeve për shqyrtimin e ligjit të vettingut, një prej ligjeve të shumëkërkuara për t'u miratuar brenda muajit gusht, pasi edhe opozita është duke punuar mbi këtë ligj, Meta nënvizoi: "Padyshim edhe unë jam i informuar për përgatitjen e përfaqësuesve të PD- së në komision. Jemi në komunikim të vazhdueshëm me ta dhe padyshim që komisioni do të mblidhet. Do të mblidhet në kohën e duhur". "Kjo, - tha më tej Meta, - është përgjigjja më e mirë që mund të them sot. Qëllimi nuk është thjesht të mbledhim komisionin, por të kemi një axhendë të qartë nga mbledhja e komisionit deri në zhvillimin e seancës. Mendoj që të gjithë janë të angazhuar pozitivisht dhe i përshëndes për angazhimin e tyre". Ende nuk ka një datë për seancën e jashtëzakonshme që pritet të mblidhet për të miratuar projektligjin e vetting- ut, por 11 gushti është afati kushtetues, dhe pas kësaj date e deri rreth fundit të gushtit deputetët kanë kohë të plotësojnë kushtin e vendosur.