Përplasen automjetet, humb jetën 70- vjeçarja e plagosen 5 të tjerë

MILOT - Një i vdekur dhe pesë të tjerë të plagosur është bilanci i një aksidenti automobilistik të ndodhur mëngjesin e djeshëm në hyrje të Rrugës së Kombit. Burime nga policia pohuan se rreth orës 06: 40, në afërsi të tregut të Milotit, një automjet me targa shqiptare u përplas me një makinë me targa të Kosovës. Mësohet se makina tip "Nisan" me targa AA 316 IV, që drejtohej nga shtetasi me inicialet D. F. është karamboluar me automjetin tip "Opel" me targa të Kosovës 07689AN, i cili drejtohej nga shtetasi kosovar me inicialet A. C.. Sipas burimeve të mësipërme, si pasojë e përplasjes së fortë mbeti e vdekur pasagjerja e mjetit "Nissan", 70- vjeçarja G. F., ndërkohë që pesë të tjerë janë plagosur dhe janë dërguar me urgjencë në spital. Ndërkohë, policia ka mbërritur shpejt në vendin e ngjarjes dhe ka nisur hetimet për zbardhjen e rrethanave të aksidentit.