Operacion antidrogë sekret në Ersekë, dyshime se policët janë të lidhur me trafikantët
Asgjësohen 18 mijë rrënjë kanabis me vlerë 10 mln euro
ERSEKË - Një operacion i mbajtur tepër sekret për të shmangur rrjedhjen e informacionit dhe dekonspirimin e veprimeve policore ka nisur në orët e para të mëngjesit të djeshëm. Për herë të parë gjatë këtij viti në fushatën antikanabis organizohet një operacion me bashkëpunimin e Prokurorisë, SHCBA ( Shërbimi Çështjeve të Brendshme Administrative), Forcave të Ndërhyrjes së Shpejt ( FNSH) dhe Drejtorisë së Policisë Korçë. Nga të dhënat e siguruara nga gazetari investigativ i "News 24", Artan Hoxha, dje në orën 01: 00 pas mesnatës, 40 trupa të FNSH- së Tiranë të mbështetura me logjistikë për aksione antikanabis janë nisur në drejtim të Kolonjës. Operacioni për arsye të sekretit hetimor është mbajtur i fshehtë, duke mos e njoftuar policinë lokale të komisariatit të Ersekës, pasi ka dyshime se efektivë të saj bashkëpunojnë me trafikantët. Në orët e para të mëngjesit, trupat e FNSH- së dhe oficerë gjyqësore të Prokurorisë dhe SHCBA pas një udhëtimi në terren të vështirë malor, kanë mbërritur në destinacion. Zona, objektiv i operacionit ndodhet në një terren të thellë malor, në kufi të tri rretheve Kolonjë- Përmet- Skrapari. Zona është shumë pak e populluar, pasi fshatrat përreth janë thuajse të braktisura nga popullsia lokale. Nga orët e para të mëngjesit e deri pasditen e djeshme, forcat e FNSH- së kanë zbuluar disa parcela të mëdha me kanabis, ku bima ndodhej në fazën e pjekjes dhe e ka kaluar lartësinë prej 2 metrash. Sasia e bimëve narkotike të asgjësuara nga policia është 18 mijë rrënjë, me një vlerë që i kalon 10 milionë euro. Dyshohet se narkotrafikantët kanë bashkëpunuar me oficerë të policisë lokale kundrejt shumave të mëdha në para. Policët e implikuar në rastin në fjalë dyshohet se u kanë dhënë ga- ranci trafikantëve se nuk do të preken gjatë aksioneve policore në këmbim të pagesave të majme. Po ashtu, policët e implikuar kanë fshehur informacionin për vendndodhjen e parcelave me kanabis dhe kanë raportuar të dhëna të rreme tek eproret e tyre. Ata akuzohen se kanë dekonspiruar çdo lëvizje të policisë te trafikantët.