Kreditimi, bankat shtrëngojnë kushtet

kanë aplikuar kushte shtrënguese për kredit imin në tremujorin e dytë të këtij viti. Ky fakt bëhet i ditur në raportin e fundit të BSH- së, ku mësohet se aktiviteti kreditues i tremujorit të dytë të vitit 2016 tregon për shtrëngim të standardeve të kreditimit të bizneseve dhe për lehtësim të standardeve të kreditimit për individët. Për bizneset, standardet rezultojnë të shtrënguara si për ndërmarrjet e vogla dhe të mesme, ashtu edhe për ndërmarrjet e mëdha. Ndërkohë, standardet për kreditë, dhënë individëve janë lehtësuar për kredinë konsumatore dhe nuk kanë ndryshuar në segmentin e kredisë për blerje banese. Sipas Bankës së Shqipërisë, faktorët kryesorë që ndikuan në shtrëngimin e standardeve të bankave për kredinë dhënë bizneseve janë problemet specifike të sektorit dhe situata makroekonomike. Faktorët që ndikuan në lehtësimin e standardeve të kredisë për individët janë konkurrenca, mjaftueshmëria e kapitalit dhe gjendja e likuiditetit. Sipas raportit, kreditë me probleme mbetën një faktor me ndikim negativ në kushtet e kreditimit, si për bizneset, edhe për individët. Politika shtrënguese e bankave ndaj kreditimit të bizneseve u zbatua kryesisht nëpërmjet rritjes së kërkesave për kolateral dhe uljes së maturitetit të kredisë së dhënë. Politika lehtësuese në segmentin e individëve u zbatua kryesisht nëpërmjet ngushtimit të marzhit mesatar për kreditë. Kërkesa e bizneseve për kredi ka mbetur thuajse e pandryshuar gjatë tremujorit të dytë të vitit 2016. Sipas ekspertëve të bankave, ndërmarrjet e vogla dhe të mesme kanë rritur kërkesën për kredi, ndërsa për ndërmarrjet e mëdha, raportohet ulje e kërkesës. Kërkesa e individëve për kredi shënoi rritje, si për kredinë konsumatorë, ashtu edhe për atë për blerje banese. Bankat presin që standardet e kredisë për biznese dhe për individë të lehtësohen gjatë tremujorit të tretë të vitit 2016. Standardet e kredisë për biznese pritet të lehtësohen vetëm për ndërmarrjet e vogla dhe të mesme.